Maqtanyń 85% shıki kúıinde eksporttalady — Depýtat sharýalar máselesin kóterdi

ASTANA. KAZINFORM — Murat Qadyrbek óziniń depýtattyq saýalynda sýarmaly sý jetispeýshiligi, topyraqtyń tozýy, ónimdiliktiń tómendigi, shıkizat baǵasynyń quldyraýy máselelerin kóterdi.

— Túrkistan oblysy — respýblıkadaǵy maqta ósiretin jalǵyz óńir. Sharýa qojalyqtary ónimin durys mólsherde ala-almaı, eńbeginen tabys tabýdyń ornyna tek shyǵyndaryn ótep, keı jaǵdaıda qaryzǵa batyp erteńgi kúnine alańdaýmen keledi, — dedi M. Qadyrbek búgingi Senat otyrysynda.

Senatordyń aıtýynsha, jaǵdaıdy odan ári qıyndatyp otyrǵan jaıt — maqtanyń shıkizat túrinde deldaldar arqyly eksporttalýy. Halyqaralyq naryqta suranystyń azaıýy jáne óńdeý shyǵyndarynyń joǵary bolýyna baılanysty jergilikti óndirýshiler tabys tappaı, tıimsiz jaǵdaıda qalyp otyr.

Elimizde maqta talshyǵyn tereń óńdeıtin 3 kásiporyn ǵana bar, olardyń úlesi 15%-dan aspaıdy, al qalǵan 85% shıki kúıinde eksporttalady. Qazaqstanda maqta ónimin óńdeý quny tonnasyna 150-170 myń teńge shamasynda, bul Qytaı men Ózbekstandaǵy baǵadan úsh ese joǵary. Mundaı jaǵdaı sharýalardyń tabysyn azaıtyp, ekonomıkalyq turaqtylyǵyna keri áser etedi.

Osyǵan baılanysty senator salany turaqtandyrý men damytý úshin keshendi sharalar qabyldaýdy usyndy.

— Naryqtyq ekonomıkaǵa saı barlyq taraptyń quqyǵy qorǵalyp, ádil básekelestik pen sapaly ónim alý úshin arnaıy maqta salasyn damytý týraly zań ázirleýdi qarastyrý qajet dep esepteımiz. Qazaqstandyq maqtanyń sapasyn jaqsartý jáne ony álemdik naryqqa shyǵarý úshin maqta sharýashylyǵyn damytýdyń salalyq baǵdarlamasyn ázirlep, engizý qajet, oǵan jergilikti atqarýshy organdar men maqta óndirýshileri tartylýy kerek. Maqta sharýashylyǵy salasyndaǵy otandyq kásiporyndardy ofteık-kontraktilermen qamtamasyz etýdi qarastyrý kerek, — dedi Murat Qadyrbek.

Buǵan deıin senator Ernur Áıtkenov Qazaqstandaǵy veterınarııa qyzmetiniń jaı-kúıine alańdaýshylyq bildirgen edi.