«Maqtanaıynshy»: Baǵlan Ábdiraıymov áýejaıda erlik jasaǵan adamnyń kim ekenin aıtty
ASTANA. KAZINFORM – Almaty áýejaıynda qaskóıdiń qolynan pyshaqty julyp alyp, erlik jasaǵan er adam týraly jańa aqparat paıda boldy.
Áýejaı qyzmetkerin qaskóıden aman alyp qalǵan 52 jastaǵy Musa Ábdiraıym «Jigitter» kvartetiniń múshesi Baǵlan Ábdiraıymovtyń aǵasy bolyp shyqty.
Ánshi Instagram jelisindegi paraqshasynda aǵasynyń erligi týraly jazba jarııalady.
— Aǵam Musa Saırambaıuly 1973 jyly Túlkibas aýdany Kúmisbastaý aýylynda dúnıege kelgen. Ol 9 balanyń kenjesi. Kásibı sportpen shuǵyldanǵan. Qazirgi tańda 5 balasy bar, ardaqty áke. Búgingi erligin kórip, el shýlap jatyr. Namysty jigigittiń bári sondaı erlikke barar edi.
Eshkim batyr bolamyn, qaharman bolamyn degen josparmen júrmesi anyq. Der kezinde durys sheshim qabyldadyńyz. Bulaı qaharman bolaryn bilgende tańda bizdi shyǵaryp salǵanda sýretke túsip alar edik. Aǵamdy memlekettik marapatqa da usynypty, - dep jazdy Baǵlan Ábdiraıymov.
Eske sala keteıik, buǵan deıin Almaty áýejaıynda jolaýshy qyzmetkerdiń shashynan tartyp, kópshilik aldynda pyshaq kezengenin jazǵan edik. Prezıdent áýejaıda qylmyskerdi ustaýǵa kómektesken azamatty memlekettik nagradaǵa usynýdy tapsyrdy.
Sondaı-aq Almatyda áýejaıyndaǵy kúdiktiniń buǵan deıin avtobýsta qyzdy urǵany belgili boldy. Al, erligimen eldi tánti etken Musa Ábdiraıym Kazinform tilshisine qysqasha suhbat berdi.