Maqtaaralmen kórshiles Jetisaı aýdanynda tasqynnyń aldyn alý sharalary júrip jatyr
JETІSAI.QazAqparat – Maqtaaral aýdanymen kórshiles jatqan Jetisaı aýdanynda da tasqynnyń aldyn alý sharalary júrip jatyr. Aýdan ákimdigi qaýipsiz aımaqqa kóshemin deýshilerge arnap úsh mektepti ázirlep, aýylǵa 50 oryndyq avtobýs daıyndap otyr, dep habarlaıdy QazAqparat tilshisi.
Aýdan ákimdiginiń málimetinshe, Atameken aýyl okrýgi Qoǵaly aýylynda 1400-deı turǵyn bar. Olardyń basym kópshiligi bala-shaǵalaryn alyp, óz erikterimen Jetisaı qalasyndaǵy týǵan-týystarynyń úılerine ornalasqan. Al, aýyldyń er kisileri kóshýden óz erikterimen bas tartyp, eldi meken irgesindegi damby kóterý jumystaryna atsalysýda. Óz kezeginde ákimdik qyzmetkerleri atalǵan aýyldy bazbireýler sý basady dep qaýeset taratyp jatqanyn aıtady. Biraq bul aqparat shyndyqqa janaspaıdy dep otyr.
«Jetisaı aýdanynyń Ózbekstan Respýblıkasymen shekaralas ornalasqan Qoǵaly aýylyndaǵy jaǵdaıdyń buǵan deıin baqylaýda bolǵanyn eskertemiz. Atalǵan eldi mekende aýdan ákimdigi men tótenshe jaǵdaılar qyzmetiniń mamandary sý tasqynyn aldyn alý sharalaryn júrgizip, damby turǵyzý men qum toly qapshyq qalaý jumystaryn atqarýda», delingen habarlamada.
