Maqtaaralǵa tasqyn sýmen aǵyp kelgen balyqtar jeýge jaramsyz – ınspektsııa

MAQTAARAL. QazAqparat – Sardoba sý qoımasynan Maqtaaral aýdanyna aǵyp kelgen topan sýdaǵy balyqtar jeýge jaramsyz. QR AShM veterınarııalyq baqylaý jáne qadaǵalaý komıtetine qarasty «Respýblıkalyq veterınarııalyq zerthana» mamandary osyndaı qorytyndy shyǵarǵan, dep habarlaıdy QazAqparat tilshisi.

Zerthana mamandarynyń aıtýynsha, topan sýdaǵy balyqtardyń ishki aǵzasynan bakterııalardyń birneshe túri tabylǵan.

«Biz 12 mamyr kúni sý basqan eldimekenderdegi balyqtyń jaramdylyǵyn anyqtaý maqsatynda 4 dana balyqty «Respýblıkalyq veterınarııalyq zerthanaǵa» jibergen bolatynbyz. Búgin qolymyzǵa saraptama qorytyndysy kelip tústi. Osy qorytyndyǵa saı biz sý basqan aýmaqtarda balyq aýlaýǵa bolmaıtynyn eskertemiz. Sonymen qatar, balyq aýlaý faktileriniń tirkelmeýin qadaǵalaımyz», - dedi Túrkistan oblystyq orman sharýashylyǵy jáne janýarlar dúnıesi aýmaqtyq ınspektsııasy balyq sharýashylyǵy bóliminiń basshysy Sháken Boranbaı.

Osyǵan oraı Túrkistan oblystyq orman sharýashylyǵy jáne janýarlar dúnıesi aýmaqtyq ınspektsııasy sarqyndy sýdaǵy balyqty aýlap, kózin joıý jumystaryn bastap ketti.

Sondaı-aq, halyq arasynda balyqty aýlaýǵa jáne tutynýǵa bolmaıtyny jóninde nasıhat jumystary jalǵasýda.