Maqtaaralǵa kómekke 200 Ózbekstan azamaty men arnaıy tehnıkalar kelip jetti
MAQTAARAL. QazAqparat – Sý tasqyny bolǵan Maqtaaral aýdanyna kómekke Ózbekstan azamattary men arnaıy tehnıkalar kelip jetti. Bul týraly óńirlik ákimdik qyzmetkerleri Facebook paraqshasynda jarııa etti, dep habarlaıdy QazAqparat tilshisi.
Apat bolǵan aımaqtaǵy jedel shtabtyń aqparattyq bólimi mamany Qanat Baısovtyń aıtýynsha, kórshi elden 42 arnaıy tehnıka men 200 adam kelgen. Tehnıkalardyń arasynda sý sorǵysh, býldozer jáne bóget salýǵa qajetti túrleri bar. Sondaı- aq ózbekstandyq jasaq eldi mekenderge jaıylǵan sýdy tazalaý men sý sorý jumystaryn júrgizbek. Sonymen qatar turǵyn úılerdiń qurylysyna da atsalysady. Jumysshylar ózderimen birge as-aýqaty men janar-jaǵarmaıyn da ala kelipti. Olar munyń bári Ózbekstan prezıdenti Shavkat Mırzıeevtiń tapsyrmasyna saı atqarylyp jatqan shara ekenin jetkizgen. Sheteldik kómekshiler erteńgi kúni taǵy turǵyn úılerdiń qurylys jumystaryna qosymsha jumysshylar keletinin jáne qajetti qurylys materıaldar jetkiziletinin málim etken.
Aıta keteıik, buǵan deıin oblys ákimi Ómirzaq Shókeev birqatar mamandarmen ózbek eline baryp, sý tasqyny máselesi boıynsha kelissózder júrgizgen bolatyn. Al, kúni keshe Ózbekstan respýblıkasynyń prezıdenti Shavkat Mırzıeev «kórshi Maqtaaral aýdanyn sý shaıyp ketkenin jáne apat saldaryn joıýǵa kómektesemiz» dep ýáde bergen edi.
