Maqtaaralǵa Atyraýdan 20 tonna balyq jetkizildi
«Nur Otan» partııasy Atyraý qalalyq fılıalynda balyqshylar sý tasqyny bolǵan óńirge balyq jiberý jóninde sheshim qabyldaǵan bolatyn. Búgin quryltaıshysy Murat Ámirǵalıev bolyp tabylatyn «Amangeldi» óndiristik kooperatıviniń balyqshylary jibergen qaıyrymdylyq júgi dittegen jerge jetkizildi. Balyq tıelgen júk kólikteri ortalyq qoımaǵa kirip, atyraýlyqtardyń amanatyn tapsyrdy.
Sonymen birge, atalǵan qoımaǵa «Transservıs Aqjol» kompanııasy atynan azyq-túlik pen kıim-keshek jetkizildi. Júk kerýenin bastap kelgen osy kompanııanyń dırektory Ótegen Aınabekov atyraýlyq azamattar arasynda kómektesýge nıettiler óte kóp bolǵanyn aıtty.
«Atyraýlyqtar Maqtaaraldaǵy apatty aýyr qabyldady. Kómektesemin deıtin azamattar kóp. Biz Maqtaaralmen birgemiz! Aýyldar qalpyna kelip, budan bylaı osy kıeli Túrkistan óńiriniń qýanyshtary mol bolǵaı», – dedi Ótegen Aınabekov.
Foto: facebook.com/nurotanatyrauoblysy
