Maqtaaralǵa Almaty oblysynan 260 tonnalyq gýmanıtarlyq kómek kelip jetti
«Nur Otan» partııasynyń «Biz birgemiz» aktsııasy aıasynda jetkizilgen kómek kerýeninde azyq-túlik pen gıgıenalyq zattar, qurylys materıaldary bar. Barlyq júkter oblystyq shtabtyń Atakenttegi ortalyqtandyrylǵan qoımasyna jetkizilgen. Al, qurylys materıaldary Myrzakent kentindegi qurylys bazasyna túsirildi. Aıta keteıik, kómek kerýenin Almaty oblystyq jastar isi jónindegi basqarma basshysy Jomart Qaratas pen «Nur Otan» partııasynyń Almaty oblystyq fılaly tóraǵasynyń birinshi orynbasary Janbolat Jórgenbaev bastap kelgen.
Jomart Qaratastyń aıtýynsha, gýmanıtarlyq kómekpen birge tasqyn bolǵan aımaqqa taldyqorǵandyq 20 erikti jas ta jetken. Olar aldaǵy ýaqytta Maqtaaral aýdanyndaǵy qurylys jumystaryna atsalysyp, túrkistandyq eriktilermen qoıan-qoltyq eńbek etedi.
«Qazaq eli qashanda bir jeńnen qol, bir jaǵadan bas shyǵaryp, qıyn sátte birlikpen bir-birine demeý bola bilgen halyq. Elimiz osyndaı syn saǵatty bastan keshirip jatqan shaqta Túrkistan oblysy Maqtaaral aýdanynda bolǵan apat barsha qazaqstandyqtardy alańdatyp otyrǵany belgili. Osy oraıda Maqtaaral halqyna el bolyp qoldaý kórsetip, memleketimizdiń túkpir-túkpirinen kómekter toqtaýsyz kelip jatyr. Búgin bizde oblys ákimi Amandyq Batalovtyń bastamasymen Jetisý jurtshylyǵynyń amanatyn arqalap kelip otyrmyz. Bul kómek kerýenine kıeli óńirimizdiń kásipkerleri men demeýshileri jáne eriktiler óz úlesterin qosty», - deıdi Janbolat Jórgenbaev.
Jetisý jurtshylyǵy jibergen 260 tonna júktiń ishinde 18 tonna un men 7 tonna kúrish, 3 630 lıtr suıyq maı men 6 tonna makaron jáne basqa da azyq-túlikter bar. Sondaı-aq, 6 myń sharshy metr qurylys aǵashy men 100 tonna tsement, 20 myń dana kirpish pen 90 qap qurylys qospasy, 15 tonna gıpsokarton men 10 tonna qurǵaq qospasy bar.
