Maqtaaralǵa - 90 jyl
TÚRKІSTAN. QazAqparat - Maqtaaral aýdanynyń 90 jyldyq merekesine arnalǵan saltanaty sharanyń shymyldyǵy «Maqtaaralym - mereıli mekenim» atty mýzykalyq teatrlandyrylǵan qoıylymymen túrildi. Ǵasyrǵa bergisiz ýaqytta tarıhı kezeńderdi ótkergen aýdannyń aıtýly kúnine jergilikti turǵyndarmen qosa Ózbekstan Respýblıkasy Syrdarııa oblysynan at aryltyp kelgen delegattar qatysty, dep habarlaıdy Túrkistan oblysy ákiminiń baspasóz qyzmeti.
«Aq altyn» mádenıet úıinde ótken mereıli merekege ortaqtasqan óńir basshysy Janseıit Túımebaev eńbekqor maqtaaraldyqtarǵa degen izgi tilegin jetkizdi.
«Oblysymyzdyń basqa aýdandary sııaqty maqtaly Maqtaaraldyń da tarıhy óte baı. Alǵashynda Myrzashól ataýymen belgili bolǵan bul mekenniń ereksheligi - jeriniń jomarttyǵynda. Maqtaaraldyqtardyń eren eńbegi shól dalany gúldi, jazıraly jánnát mekenge aınaldyrdy. Myrzashól dalasyn sýlandyrýdaǵy negizgi maqsat - maqta alqabyn molaıtý edi. Alǵash ret aýdanda maqta sharýashylyqtary qurylyp jatqanda Túrkistan jer sharýashylyǵy halyq komıssary qyzmetin atqaryp júrgen ult maqtanyshy Sultanbek Qojanov kanaldy qazýshylarmen bolǵan kezdesýinde maqtanyń asa qymbat shıkizat ekenin, bolashaqta aq altyn kúlli Túrkistan ólkesiniń baılyǵy bolatynyn aıtqan eken. Mine, Elbasymyzdyń tikeleı qoldaýymen Túrkistan oblysynyń jańa dáýiri bastalyp keledi. Oblysymyzdyń qıyr ońtústiginde ornalasqan, aq altynnyń ordasy - maqtaly Maqtaaral aýdanynyń merekesi bárimizge ortaq. Maqsat - toı toılaý emes, bir ǵasyrǵa jýyq ýaqyt aralyǵyndaǵy oqıǵalardy oı eleginen ótkizý. Eldiń birligin nyǵaıtyp, ıgi iske jumyldyrý», - dedi Janseıit Qanseıituly.
Óńir basshysy kelesi kezekte Myrzakent kentiniń ortalyq alańyndaǵy kúzgi jıyn-terim naýqanyn qorytyndylaýǵa arnalǵan «Altyn kúz - 2018» is-sharasynyń bel ortasynan tabyldy. Bıylǵy jyly maqtaaraldyq dıqandar 60 926,3 gektar jerge egistik ekse, onyń 38 593,2 gektary maqta daqylyna tıesili. Aýdan boıynsha búginge deıin 96 myń 600 tonna «aq altyn» jınalǵan.
Bıyl qazaq maqtasyna 100 jyl tolyp otyr. Osyǵan oraı aımaq basshysy Atakent kentindegi «Qazaq maqta sharýashylyǵy» ǵylymı zertteý ınstıtýtynda ótken Qazaq maqtasynyń 100 jyldyǵyna arnalǵan halyqaralyq ǵylymı-teorııalyq konferentsııasyna qatysty.
Maqtaaral aýdanynyń 90 jyldyq mereıtoıy «Terme - boıtumarym» atty termeshiler baıqaýy, «Palaý festıvali» is-sharasy, jastar arasyndaǵy jaıdarman oıyndarynan soń aýdan ónerpazdarynyń merekelik kontsertine ulasty.
3 kúnge josparlanǵan shara «Alpamys batyr» stadıonynda taýar óndirýshiler men qolónershiler kórmesi, «Baýyrsaq festıvali» is-sharasy jáne búkil qazaqtyń delebesin qozdyrǵan kókparmen qorytyndylandy.
