Maqtaaraldyqtarǵa AÁK-tiń jańa formaty túsindirildi

MAQTAARAL. QazAqparat – Túrkistan oblystyq Jumyspen qamtýdy úılestirý jáne áleýmettik baǵdarlamalar basqarmasynyń basshysy Ásııa Temirbaeva Maqtaaral aýdanynda kópbalaly analarmen kezdesý ótkizdi. Onyń barysynda ataýly áleýmettik kómektiń jańa formaty týraly túsindirip, turǵyndar tarapynan qoıylǵan suraqtarǵa jaýap berdi, dep habarlaıdy QazAqparat tilshisi.

Aýdan ákimi Baqyt Asanov tóraǵalyq etken jıynda AÁK-tiń jańa modeli boıynsha 2020 jyldan bastap kópbalaly analar men az qamtamasyz etilgen otbasylarǵa memlekettik járdemaqy berilýdiń tártibi túsindirildi. AÁK-tiń dástúrli qalpy jáne kepildendirilgen áleýmettik paketter boıynsha memlekettik kómek ala alatyndary aıtyldy. «Jańa járdemaqy 4 jáne odan joǵary kámeletke tolmaǵan nemese 23 jasqa tolǵanǵa deıin kúndizgi oqý nysany boıynsha bilim alatyn balalary bar kópbalaly otbasylarǵa tabysyna qaramastan taǵaıyndalady (orta eseppen ár balaǵa 10625 tg.). Máselen, 4 balasy bar analar - 42 500 teńge, 5 bala úshin – 53 125 teńge, 6 balaǵa - 63 750 teńge, 7 balasy barlar 73 375 teńge járdemaqy alatyn bolady» - dedi Ásııa Temirbaeva. Basqarma basshysy sondaı-aq, AÁK-tiń eski modelimen salystyra otyryp jańa modeldi túsindirip berdi. AÁK taǵaıyndaý merzimi toqsan saıyn bolatynyn, onyń mólsheri barlyq otbasy múshelerine jan basyna shaqqandaǵy ortasha tabys pen kedeılik shegi arasyndaǵy aıyrma túrinde júretinin, jumystan bas tartqan jaǵdaıda AÁK quqyǵynan otbasy músheleriniń barlyǵy aırylatynyn, ýchaskelik komıssııalardyń zertteý-tekserý boıynsha krıterıılerin aıtyp berdi. Sonymen qatar, kepildendirilgen áleýmettik paketter týraly da keńinen jetkizdi.