Maqtaaraldyqtar qıyn qystaý kezeńde qol ushyn bergen azamattarǵa alǵys bildirdi
MAQTAARAL. QazAqparat – Maqtaaraldyqtar qıyn qystaý kezeńde qol ushyn bergen azamattarǵa alǵystaryn bildirdi. Evakýatsııa oryndarynda ornalasqan turǵyndar osyndaı qaıyrymdylyqtan shet qalmaǵan memleket basshylyǵyna, úkimetke, oblys, aýdan basshylyqtaryna jáne barlyq qazaqstandyqtarǵa shynaıy alǵystaryn aıtýda, dep habarlaıdy QazAqparat tilshisi.
Oblys ákimdiginiń málimetinshe, topan sýdan zardap shekken Jeńis, Jańaturmys, Ferdaýsı, Órgebas jáne Dostyq aýyldarynyń 6 myńnan asa turǵynyna jan-jaqty kómek kórsetilýde. Mektepter men kolledjderdegi, meshitterdegi 3 myńnan astam adamnyń búgingi jaı-kúıi birqalypty. Olardyń barlyǵy medıtsınalyq tekseristen ótkizilip, jatyn orynmen jáne kórpe-tósekpen tegis qamtylǵan. Turǵyndarǵa kúnine úsh mezgil tamaq beriledi. Azyq-túlik pen jeke bas gıgıenasyn saqtaýǵa qajetti kerek-jaraqtyń bári jetkizilýde. Barlyq aýdandaryndan ákelinip jatqan kómek tótenshe jaǵdaıǵa baılanysty jasaqtalǵan ortalyq qoımada saqtalady. Óz kezeginde tolyqtaı sý astynda qalǵan Fırdoýsı aýylynyń turǵyndary úı-jaı men mal-múlikteri jáne egistik alqaptarynyń shyǵyndary óteletindigin de estip, bir sergip qaldy.
«Shyǵyn óteledi, dedi oblys ákimi Ómirzaq Shókeev. Ony osynda turyp jatqan barlyǵymyz estip, kóńilimiz ornyna tústi. Úıimizdiń ornyna úı salynsa, egistikke jumsaǵan shyǵyndar ótelse, el rıza. Kún jyly, kútemiz. Qasaqana jasalǵan is emes. Ony kózben kórip otyrǵan soń, kónemiz. Qurylys bastalsa, ózimiz basynda júremiz, dep qýanyp júrmiz. El aman bolsyn. Kómek jiberip jatqan barsha qazaqstandyqtarǵa myń alǵys aıtamyz», - deıdi Fırdoýsı aýyly turǵynynyń biri Nadır Fahrýddın.
Aýyldardaǵy sý ketken soń, ár úıge kelgen shyǵyn Arystaǵy tótenshe jaǵdaı tájirıbesi boıynsha esepteledi. Arnaıy komıssııa úılerdi qalaı qalpyna keltiretinin sheship, zardap shekken ár otbasyǵa ótemaqy tólenedi. Tipti egis alqaptary sýǵa ketken sharýalardyń shyǵyny da qaıtarylady. Ázirge mal shyǵyny naqtylanýda.
«Bes balamyzdy súırep sol túni úıdi tastap qashtyq. Mundaıdy Alla eshkimniń basyna bermesin. Sózben jetkizý múmkin emes. Apattyń ádeıi jasalmaǵanyn bilemiz. Aman qalǵanymyzǵa shúkir. Mektepte jatyrmyz. Tósek orny tap-taza, balalarǵa kıim-keshek berdi. Tamaq berip jatyr. Bárine rızamyz. Jasalǵan jaqsylyqtaryńyz úshin elime rızamyn»,- deıdi Mahfırat Qurbanova.
Turǵyndardyń sý ortasyndaǵy mal-múlkin polıtseıler kúzetýde. Nurlyjol, Órgebas, Yrysty, Jantaqsaı eldi mekenderinde tasqynǵa qarsy bóget salyndy, Fırdoýsı eldi mekeniniń mańynda kollektor ornalastyrylǵan.
Aıta keteıik, qazirgi tańda avarııalyq – qutqarý jumystaryn júrgizý úshin 986 adam, 10 júzý qurylǵysy, 180 tehnıka jumyldyrylǵan. Sonymen qatar, Qyzylorda, Jambyl oblystary men Shymkent qalasynan 30 ónimdiligi joǵary sý jınaǵysh soraptar kelgen. Qabyldaý evakýatsııalyq pýnkteri qajetti qural-jabdyqtar men azyq-túlikpen qamtamasyz etilgen. 120 medıtsına qyzmetkeri medıtsınalyq kómek kórsetýde. Kórshiles oblystar men oblystyń barlyq aýdandarynan, kásipkerler tarapynan túrli kómekter kórsetilip, qoldaý bildirilýde.
