Maqtaaraldyq jastar qarttarǵa qamqorlyq jasady
MAQTAARAL. QazAqparat – Túrkistan oblysy, Maqtaaral aýdanynda «Jastar resýrstyq ortalyǵy» KMM janynan qurylǵan eriktiler klýbynyń músheleri men belsendi jastar qarttarǵa qamqorlyq jasady. Kentter men aýyldyq okrýgterde turatyn jalǵyzbasty qarııalar men asyraýshysy joq ata-ájelerge, az qamtamasyz etilgen jáne múmkindigi shekteýli jandarǵa kómek kórsetti, dep habarlaıdy QazAqparat tilshisi.
Jastar qazynaly qarttardyń úıine baryp, senbilikter ótkizdi. «Myrzakent» mektep-gımnazııasynyń erikti jastary jalǵyzbasty zeınetkerler Valentına Tereshkova men Darıǵa Sársenbaevalardyń úılerinde qora-qopsylardy tazalap, áktep-syrlaý jumystaryn júrgizdi. Kir-qońyn jýyp, qoqystaryn shyǵarý syndy jumystaryn jasap berdi. Qarttardyń áńgimesi men aqyldaryn tyńdap, keńesterine qulaq túrdi. El damýynyń keshegisi men búgingisinen habardar boldy. Jas órender osylaısha tek kómek kórsetip qana emes, ómir tájirıbelerinen estelikter estip qaıtty. «Bar jastyq kúsh-jigerin eldiń damýy men búgingi urpaqtyń bolashaǵyna arnap, táýelsizdiktiń irgetasyn qalasqan qarııalar qashanda qoǵamnan shet qalmaýy tıis. Olar elimizdiń shańyraǵyn kóterisip, keregesin bekemdeýde ózindik iz qaldyrǵan. Sol jandardyń ótken ómirleri men eńbek joldaryn óskeleń urpaqqa ónege etý maqsatynda túrli is-sharalar uıymdastyrýdamyz»,- deıdi Jastar ortalyǵynyń músheleri.
