Maqtaaraldyq sharýalar qyryqqabat egýdi bastap ketti
TÚRKІSTAN. QazAqparat - Túrkistan oblysy Maqtaaral aýdanynyń sharýalary qańtardyń qaq ortasynda dıqanshylyqty bastap ketti. Erte ónim beretin qyryqqabat daqylyn egý naýqanyna qazirdiń ózinde 10-nan astam brıgada qatysyp, qyzý jumys júrýde, dep habarlaıdy QazAqparat tilshisi.
Aýdan ákimi Baqyt Asanov qańtardyń jaýyn-shashynyna qaramastan egistik alqapta jumys jasap jatqan dıqandardyń jumysymen tanysyp qaıtty. Maqtaaral aýyldyq okrýgindegi «Ferýdın» sharýa qojalyǵynda 10 gektar jer bar bolsa, sonyń 5 gektaryna qyryqqabat daqyly egilýde. 30 adamnan quralǵan brıgada qańtardyń árbir jyly kúnin paıdalanyp, kóshet otyrǵyzyp jatyr.
«Jylyjaıda 120 myń túp qyryqqabattyń kóshetin daıyndap, 30 adamnan quralǵan brıgadamen kóshet otyrǵyzýdy bastadyq. Jumysshylarǵa kúnine 2 myń teńgeden eńbek aqysyn tóleýdemiz. Negizinen 2 aıdyń kóleminde ekken eginimiz pisip, jetiledi. Sondaı-aq, 90 kúnde jetiletin sortyn da ektik. Kóshetterdiń ústin japqyshpen jaýyp, jaýyn-shashynnan qorǵaımyz. Eń bastysy - kútip-baptaýǵa úlken mán berilýi kerek», - deıdi sharýa qojalyǵynyń tóraǵasy Mırzadın Alıev.
Dıqandar negizinen salmaǵy 1-1,5 keliden aspaıtyn qyryqqabattyń nıderlandyq pandıon surpyn otyrǵyzýda. Erte pisetin ónim túrine eýropalyqtar men reseılikter tarapynan suranys kóp. Aýdan ákimi sharýa qojalyǵyndaǵy jumysshylarǵa qolǵabys jasaý úshin qyryqqabat egýge kómektesip, kóshetter otyrǵyzdy. Sondaı-aq, qojalyq ıeleriniń eginine bereke tilep, mol ónim alý úshin tynbaı eńbektený kerektigin aıtty.
Jalpy, qyryqqabat daqyly erte pisetindikten, maqtaraldyq dıqandar onyń sońynan qaýyn-qarbyz, maqta sııaqty t.b. daqyldar egýge kirisedi. Osylaısha jer emgen sharýalar bir jylda eki ret ónim alady. Byltyr sáýir aıynda alǵashqy ónimin alǵan maqtaraldyq dıqandar respýblıkanyń birneshe oblysyn jáne Reseı Federatsııasyn qyryqqabatpen qamtamasyz etken bolatyn.
Aıta keteıik, Maqtaaral aýdanynda byltyr 30 myń tonnaǵa jýyq kókónis ónimderi jınalǵan bolatyn.
