Maqtaaraldyq polıtseıler ákeleri órtten qaza bolǵan balalarǵa kómek kórsetti

MAQTAARAL. QazAqparat –Túrkistan oblysy Maqtaaral aýdanynyń polıtseıleri «Mektepke jol» qaıyrymdylyq sharasyn ótkizdi. Shalǵaı aýdannyń tártip saqshylary ákeleri órtten qaza bolǵan azamattyń balalaryna kómek kórsetti, dep habarlaıdy QazAqparat tilshisi.

Aıta keteıik, QR Bilim jáne ǵylym mınıstrliginiń bastamasymen uıymdastyrylǵan sharaǵa óńirdegi barlyq aýdan-qaladaǵy polıtsııa bólimderi atsalysýda. Sonyń ishinde «Júrekten júrekke» urany aıasynda Maqtaaral aýdandyq polıtsııa bóliminiń qyzmetkerleri birneshe otbasyǵa kómek qolyn sozdy. Olar tilsiz jaýdan baspanasynan aıyrylyp, jany qınalǵan jalǵyzbasty anaǵa járdem kórsetti. Órtte kıim-keshekteri tolyq órtenip ketken úsh ulyna mektepke qajetti zattaryn, mektep formasy men sporttyq kıimderin alyp berdi. Odan bólek, órtengen turǵyn úıdi qalpyna keltirip, qurylys jumystaryna kómek berýge daıyn ekendikterin jetkizdi. Óz kezeginde úsh balasymen jalǵyz qalǵan ana basyna túsken qaıǵyly jaǵdaıda el bolyp kómek kórsetip júrgen polıtsııa qyzmetkerlerine shynaıy alǵysyn bildirdi.

Eske salaıyq, tótenshe jaǵdaı aǵymdaǵy jyldyń 23 tamyzy kúni boldy. Turǵyn úıden órt shyǵyp, otaǵasy úıde qalyp qoıǵan. Ol syrtqa shyǵa almastan, janyp ketken edi. Al balalary úıdi ot sharpyǵan sátte dalada oınap júrgen. Qazirgi tańda oqıǵaǵa baılanysty tekserý jumystary júrgizilýde.