Maqtaaraldyq mektepterde dinı ekstremızm men terrorızmniń aldyn alý máseleleri túsindirildi

MAQTAARAL. QazAqparat – Túrkistan oblysy Maqtaaral aýdanyndaǵy mektepterde dinı ekstremızm men terrorızmniń aldyn alý máseleleri túsindirildi. «Jastar resýrstyq ortalyǵy» KMM uıymdastyrǵan kezdesýde oqýshylarǵa tanymdyq dárister júrgizilip, tıisti málimetter berildi, dep habarlaıdy QazAqparat tilshisi.

Atalǵan sharalar Qazaqstan Respýblıkasynyń Tuńǵysh Prezıdenti - Elbasy N.Á.Nazarbaevtyń «Din salasyndaǵy memlekettik saıasattyń 2017-2020 jyldarǵa arnalǵan tujyrymdamasy» aıasynda dinı ekstremızm men terrorızmniń aldyn alý maqsatynda uıymdastyryldy.

Alǵashqy kezdesý Nurly jol aýylynda ornalasqan jalpy orta mektebi men Araıly aýylynda ornalasqan «S.Datuly» atyndaǵy bilim uıasynda ótti. Maqtaaral aýdany boıynsha din zertteý ortalyǵynyń teologtary Azamat Jálelov pen «Jastar resýrstyq ortalyǵy» KMM teolog-ınspektory Almasbek Qojahmetter keraǵar aǵymdardyń jetegine erip, týra joldan adasyp júrgen azamattar týraly keń kólemde aqparat berdi.

Sondaı-aq, jat aǵymdardyń arbaýyna túspeý úshin dinı saýattylyqty kóterý kerek ekendigin naqtylap aıtty. Mekteptiń joǵarǵy synyp oqýshylary qatysqan sharada jastar men teolog mamandar arasynda ashyq áńgime órbip, erkin formatta pikir almasty. «Álem halyqtarynyń júregine úreı uıalatyp, qorqynyshtyń dánin sepken, meıirim men adamı qasıetke toly dinimizdiń atyn jamylyp aram pıǵyldaryn júzege asyryp júrgen ekstremıstik toptarǵa qoǵam bolyp qarsy turǵanda ǵana bul túıitkildi máseleniń sheshimin tabýǵa bolady»,- dedi kezdesýge qatysqan teologtar.