Maqtaaraldyq maqtashylar ózara tájirıbe almasty
MAQTAARAL. QazAqparat – Túrkistan oblysy, Maqtaaral aýdanyndaǵy maqtashylar semınar-keńeste bas qosyp, ózara tájirıbe almasty. Aýdandyq aýyl sharýashylyǵy bóliminiń basshysy Óser Myrzamdanov tóraǵalyq etken jıynǵa aýyldyq okrýg ákimderi, ǵalymdar, jer jáne aýyl sharýashylyǵy boıynsha basshylar men mamandar, sharýa qojalyq basshylary qatysty, dep habarlaıdy QazAqparat tilshisi.
Semınardyń kún tártibinde topyraqtaný salasynda júrgizilip jatqan jumystar jáne ınnovatsııalyq tehnologııalardy paıdalaný arqyly daıyndalǵan «BıoEkoGým» preparatynyń qasıetteri jóninde máseleler talqylandy. Jıynnyń praktıkalyq bóliminde semınarǵa qatysýshylar «Dılshod» sharýa qojalyǵynyń maqtalyq alqabyn aralady. Qojalyqtyń jalpy jer kólemi 28,04 gektardy quraıdy. Munda mamyr aıynyń basynda «S-4727» atty aq altyn sorty egilip, jerdi qunarlandyrýǵa arnalǵan «BıoEkoGým» preparatyn qoldaný arqyly gektaryna 30 tsentnerden asa ónim alynyp jatyr. Bul tájirıbeni basqa da sharýa qojalyqtary qoldaný kerektigin qojalyq basshysy atap ótti. Munan soń semınardyń teorııalyq bólimi bastalyp, aýdandyq aýyl sharýashylyǵy bóliminiń basshysy Ó.Myrzamdanov kúzgi jıyn-terim naýqanynyń barysy týraly baıandama jasady. Sondaı-aq, topyraqtaný salasynda júrgizilip jatqan jumystar jóninde Qazaq topyraqtaný jáne agrohımııa ǵylymı zertteý ınstıtýtynyń bas dırektroy Abdýlla Saparov, ınnovatsııalyq ádisterdi paıdalaný arqyly daıyndalǵan «BıoEkoGým» preparatynyń qasıetteri jáne osy preparatty paıdalaný arqyly maqta daqylynyń ónimdiligin arttyrý boıynsha «Dılshod» sharýa qojalyǵynyń basshysy Rahmon Halıkov sóz sóıledi. Aýyl sharýashylyǵy salasynyń basqa da ózekti máseleleri jóninde «Atameken» ulttyq kásipkerlik palatasynyń sarapshysy Tursynbaı Berdalıev óz oıymen bólisti. Aıta keteıik, bıyl maqtaaraldyq dıqandar 38 myńnan asa gektar jerge maqta shıtin sepken bolatyn. Qazirgi tańda maqta terim naýqany jappaı bastalyp, maqtashylar 2 myń tonnadan astam aq altyndy qambaǵa jınap úlgerdi.
