Maqtaaraldyq kásipker ózge óńirden kómek ákelgenderge 600 tonna qyryqqabatty tegin berdi

MAQTAARAL. QazAqparat – Maqtaaral aýdanynda sý tasqynynan zardap shekken azamattardy asa qajet taýarlarmen qamtamasyz etý úshin 600 tonnadan astam gýmanıtarlyq kómek jınaldy. Óz kezeginde jergilikti kásipker Qanat Maratuly ózge óńirden gýmanıtarlyq kómek ákelgen júk kólikterine 600 tonna qyryqqabatyn tegin tıep jiberdi, dep habarlaıdy QazAqparat tilshisi.

Maqtaaraldyq dıqan elimizdiń barlyq óńirlerinen kelip jatqan kómekke osylaısha óz rızashylyǵyn bildirdi. Bul is aýdan ákimi Baqyt Asanovtyń bastamasymen qolǵa alynyp otyr.

Kásipkerdiń aıtýynsha, maqtaaraldyqtarǵa qıyn tusta kómek qolyn sozǵan azamattarǵa alǵyspen jaýap qatý – azamattyq paryz.

Aıta keterligi, búgingi tańda evakýatsııalyq pýnkterde ornalasqan zattardyń 218 tonnasy tasqynnan zardap shekken turǵyndarǵa taratylǵan. Onyń basym bóligi - azyq-túlik, gıgıenalyq, medıtsınalyq, turmystyq-tehnıkalyq, qurylys zattary jáne kıim-keshek.