Maqtaaraldyq kásipker memlekettik baǵdarlamamen kásibin ulǵaıtyp otyr
MAQTAARAL. QazAqparat – Túrkistan oblysynyń Maqtaaral aýdanyndaǵy turǵyny Tystybaı Sraılov memlekettik qoldaýdyń arqasynda kásibin ulǵaıtyp otyr. Aýyl turǵyny shaǵyn kásibin damytý úshin 2018 jyly «Qarapaıym zattar ekonomıkasy» baǵdarlamasy aıasynda tómen paıyzben 29,4 mln teńge nesıe alǵan, dep habarlaıdy QazAqparat tilshisi.
Kásipker «Qudaıbergen» sharýa qojalyǵyn quryp, iri qarany bordaqylaý isin qolǵa alǵan. Búginde sol alǵan nesıesiniń kómegimen mal basy sanyn 150-ge jetikizip otyr. Sharýa endigi jerde mal azyǵy óndirisin qolǵa alyp, shyǵyn kólemin azaıtýdy josparlap jatqanyn aıtty.
«Jalpy óńirde etke degen suranystyń mol ekenin baıqap, mal bordaqylaýmen aınalysqandy jón dep taptym. Ótken jyly 31 tonna et óndirip satylymǵa shyǵardyq. Suranystyń kóptigine baılanysty búginde óndirgen etimiz aýdannyń dúkenderi men bazarlarynan artylyp jatqan joq. Oblys, respýblıka kólemindegi naryqqa shyǵý úshin mal basyn kóbeıtip otyrmyz. Soǵan baılanysty mal azyǵyn da arttyrýmyz kerek. Qazir tańda 10 gektar jerge jońyshqa ektik. Bul da azdyq etetindikten gıdroponıka azyǵyn daıyndaýdy josparladyq. Jańa tehnologııa arqyly 1 keli jem-shópten 7 kelige deıin mal azyǵyn alatyn bolamyz», – dedi Tystybaı Sraılov.
Búginde qojalyqtyń menshiginde 400 basqa arnalǵan qora bar. Mal basyniń artýyna baılanysty qosymsha 300 iri qara syıatyn qora salynýda. Kásipker aldaǵy ýaqytta qoı ósirý isin de qolǵa alýdy josparlap otyr. Aıta keteıik, jalpy aýdan kóleminde 150 mal bordaqylaý alańy jumys istep keledi.
