Maqtaaraldyq kásipker kópbalaly otbasyǵa baspana syılady

TÚRKІSTAN. QazAqparat- Túrkistan oblysynyń Maqtaaral aýdanynda metsenat-kásipker kópbalaly otbasyǵa baspana syılady. Mamyrovtar januıasy kóp jyldan beri baspanasyz, jaldamaly páterde turyp kelgen, dep habarlaıdy QazAqparat tilshisi.

Atalǵan sharaǵa aýdandyq Іshki saıasat, mádenıet jáne tilderdi damytý bólimi men «Jastar resýrstyq ortalyǵy» KMM basshylary, aýdan ımamdary men BAQ ókilderi qatysty.

Aıta keteıik, ІІ top múgedek otaǵasy Muhtar Mamyrov jumyssyz bolsa, jary Uldyqyz Mamyrova Myrzakent kentindegi «Abylaıhan» jalpy orta mektebinde eden jýýshy bolyp isteıdi.

Erli-zaıyptylardyń kámelet jasqa tolmaǵan bes perzenti bar. Kásipker Orynbasar Jumabaev «Maqtaaral baspana» qory arqyly baspanaǵa shyn muqtaj otbasyn orazanyń alǵashqy kúninde qýantýdy jón kórgenin aıtady.
«Bul bastama tek basy ǵana. Biz búginde aýdan ákiminen bastap barlyq aýyldyq okrýgterdiń ákimderinen jer telimderin surap jatyrmyz. Ýchaske berilip jatsa biz úı salyp berýge daıynbyz»,- deıdi Maqtaaral aýdandyq sottyń tóraǵasy, «Maqtaaral baspana» qorynyń belsendisi Qunanbaı Musaev.