Maqtaaraldyq dıqandar qaýynnyń jańa sorttaryn shyǵardy
MAQTAARAL. QazAqparat – Túrkistan oblysyna qarasty Maqtaaral aýdanynyń dıqandary qaýynnyń jańa sorttaryn shyǵardy. Dámi til úıiretin «Jıenbet», «Valet» atty qaýyn túrleri tasymaldaýǵa tózimdi, ıaǵnı uzaq jolǵa beıimdelgen, dep habarlaıdy QazAqparat tilshisi.
Kólemi de yńǵaıly, bir qorapqa 6-7 qaýyn syıady. Jańa sorttardyń arqasynda sońǵy jyldary dıqandar úlken tabys taýyp, Reseı men Eýropanyń birneshe elderiniń naryǵyna kirip otyr. Mamandardyń aıtynsha, elimizdegi eń tátti qaýyn-qarbyzdar Maqtaaral aýdanynda ósedi. Reseılik jáne Eýropalyq kásipkerler de osyndaı pikirde. Buǵan dálel - maýsym kezinde kún saıyn 200-300-ge tarta qaýyn-qarbyz tıelgen júk kólikteri TMD, Prıbaltıka, Túrkııa, Germanııa, Gretsııa elderine jol tartady.
Bıyl aýdan sharýalary 10 myń gektarǵa qaýyn, 1500 gektardan asa jerge qarbyz ekken. Búginde jergilikti dıqandar baldaı táttiligimen, erekshe iriligimen tanymal «Myrzashól» qaýynyn eksportqa shyǵaryp otyr.
Osylaısha qaýyn-qarbyz bıznesi Maqtaaral aýdanynda tutas bir ındýstrııanyń damýyna jol ashyp otyr.
