Maqtaaraldyq dıqandar 1 myń tonna qarbyz eksporttady
MAQTAARAL. QazAqparat - Túrkistan oblysy, Maqtaaral aýdanynda dıqandar 1 myń tonna qarbyz ben 20 tonna qaýyndy eksportqa shyǵardy. Bul týraly Maqtaaral aýdandyq aýyl sharýashylyǵy bóliminiń basshysy Ǵalym Dúısenbekov málim etti, dep habarlaıdy QazAqparat tilshisi.
Ǵalym Dúısenbekovtyń aıtýynsha, Maqtaaral aýdany dıqanshylyqqa óte qolaıly aımaq. Erte kóktemnen egistikke kirisetin sharýalar baqsha daqyldaryn TMD elderine tasymaldap keledi. Oblys ákimi Ómirzaq Shókeevtiń tapsyrmasyna sáıkes, bir alqaptan 2-3 ónim alý jobasy aıasynda da atqarylyp jatqan jumystar óz nátıjesin berýde. Máselen, Jalyn eldi mekeninde ornalasqan «Jorabek» sharýa qojalyǵy erte pisken ónimin Belarýske eksporttap jatyr. Qojalyqtyń basshysy Raıymbek Qaldybaev qarbyzdyń «Dolbı» atty surpyn egip, 60 kúnde ónimin jetildirgen. Jýyrda ol júk kóligimen 25 tonna ónimdi shetelge jóneltpekshi. Dıqan qarbyzdan soń egistik jerine mal azyqtyq daqyl túrlerin egip, bir jylda eki ret ónim alýdy josparlap otyr.
«Jalpy aýdan boıynsha bıyl 10 667,3 gektar jerge baqsha daqyly egilgen. Onyń ishinde plenkaly qaýyn 3 535,7 gektar, ashyq topyraqta egilgen qaýyn 5867,6 gektardy quraıdy. Sondaı-aq, plenkaly qarbyz 831 gektardy, ashyq topyraqta egilgen qarbyz 433 gektarǵa jetip otyr. Ótken jyly aýdanda 300 myń tonnaǵa jýyq baqsha ónimderi óndirilgen bolatyn. 12 aıda aýyl sharýashylyǵy óniminiń jalpy kólemi 44,9 mıllıard teńgeni quraǵan edi»,- deıdi Ǵalym Dúısenbekov.
