Maqtaaraldyq balalar Jambyl oblysynda demalady
TARAZ. QazAqparat – Túrkistan oblysynyń Maqtaaral aýdanynda sý tasqynynan zardap shekken otbasylardyń balalary Jambyl oblysynda demalady. Bul týraly Jambyl oblysy ákimdiginde ótken jıynda aımaq basshysy Berdibek Saparbaev aıtty, dep habarlaıdy QazAqparat.
Óńir ákimdiginiń aqparatyna súıensek, bıyl jazǵy demalys lagerleri maýsymnyń ekinshi jartysynda jumysyn bastaıdy. Osy oraıda 8,5 myńnan astam bala PTR-test tapsyratyn bolady.
Atalǵan basqosýda baıandama jasaǵan oblystyq bilim Basqarmasynyń basshysy Gúlnár Hodjabergenova mektep janyndaǵy lagerlerdi ashpaýdy usyndy. Mektepte olardy ustaý úshin qarajattyń tapshylyǵymen qatar, balalardyń sanıtarlyq normalardy saqtaýynda qosymsha problemalar týyndaýy múmkin.
«Oblysta bar-joǵy 11 balalar lageri bar. Bul - óte az. Jańa lagerler ashatyn bolamyz. Túrkistan oblysynyń Maqtaaral aýdanynda sý tasqynynan zardap shekken balalardyń demalysyn uıymdastyrýdy mindetti túrde qolǵa alamyz.
Bizdiń balalardy Qazaqstannyń basqa óńirlerine turaqty túrde demalýǵa jiberip otyrý kerek. Sonda olar óz qatarlastarymen aralasyp, elimizdi tereńirek tanı túsedi», - dep atap ótti Berdibek Saparbaev.
Jıynda aımaqtaǵy 442 mekteptiń 5-eýi apattyq jaǵdaıda ekendigi aıtyldy. Bul máseleni sheshý úshin ótken jyldan bastap Qordaı aýdanynda bir jáne Shý aýdanynda eki mekteptiń qurylysy júrgizilýde.
Úsh aýysymdy toǵyz mekteptiń jaı-kúıi boıynsha 2021 jylǵa aıryqsha basymdyq berilýde. Keler jyly birden mundaı alty mekteptiń máselesi sheshiledi dep kútilýde. 41,5 myń mektep jıhazdaryn aýystyrý úshin 749,3 mln. teńge qajet desek, Berdibek Saparbaev birinshi kezekte taqtalar men partalardy aýystyrýǵa kóńil bólýdi tapsyrdy. Mundaı sharaǵa nysandardy salatyn kompanııalar da atsalysýy tıis.
«Qashyqtan oqytýdyń jańa túrlerin belsendi engizý qajet. Bul ásirese múgedek balalar úshin mańyzdy. Barlyq mektepterde Nazarbaev Zııatkerlik mektepteriniń tájirıbesin engizýi, óz túlekterimen baılanysty nyǵaıtýy qajet. Jabdyqtalǵan dárethanalar men beınekameralardyń jıyntyǵy árbir mektepte bolýy kerek, bul Úkimettiń tapsyrmasy. Oqý oryndarynyń syrtqy kórinisin, qorshaýlaryn rettke keltirip, irgeles jatqan aýmaqty abattandyrýǵa den qoıǵan durys», - dedi oblys ákimi.
