Maqtaaraldyq balalar Almaty oblysy men Tólebı aýdanyndaǵy lagerlerde demalady
MAQTAARAL. QazAqparat – Maqtaaral aýdanyndaǵy sý basqan eldimekenderde turatyn oqýshylar jazǵy kanıkýldy tıimdi ótkizetin boldy. Bes aýyldaǵy 1210 oqýshy Almaty oblysy men Tólebı aýdanyndaǵy lagerlerde demalady dep josparlanyp otyr, dep habarlaıdy QazAqparat tilshisi.
Oblystyq ákimdiktiń málimetinshe, balalar Qapshaǵaı qalasyndaǵy «Baldáýren-Qapshaǵaı» oqý-saýyqtyrý lagerine 15 kúndik demalysqa jiberilmek.
Atalǵan ortalyqta 706 oqýshy úsh kezeńmen tynyǵady. Onyń 250-i kúni keshe jolǵa shyǵyp, lagerge attanyp ketti.
Al, 504 oqýshy jazǵy demalysyn Túrkistan oblysynyń Tólebı aýdanynda ornalasqan lagerde ótkizedi. Bastaýysh synyptyń 200 oqýshysy jáne olarǵa bas-kóz bolatyn 15 muǵalim men medbıke «Baldáýren-Túrkistan» oqý-saýyqtyrý ortalyǵyna jolǵa shyǵyp ketti.
Jetkinshekter demalys oryndarynda qosymsha sabaq ta oqıtyn bolady. Bul sharalar óz kezeginde mektep jasyndaǵy balalardyń ýaqytyn tıimdi ótkizip, salaýatty ómir saltyn ustanýǵa baǵyttalǵan.
Sonymen qatar olardyń jańa dostar taýyp, tynyǵyp qaıtýyna septigin tıgizbek.
