Maqtaaraldan Ózbekstanǵa qatynaıtyn jol ashylatyn boldy
ShYMKENT. QazAqparat - Ońtústik Qazaqstan oblysynyń ákimdiginde Qazaqstan Respýblıkasynyń Ózbekstan Respýblıkasyndaǵy Tótenshe jáne Ókiletti Elshisi Erik Ótembaev pen Ózbekstan Respýblıkasy Syrtqy ister mınıstrliginiń aıryqsha tapsyrmalar boıynsha Elshisi Ilhom Nematov kezdesip, qos memlekettiń týystyq qarym-qatynasyn odan ári jaqsartyp, damytý jaıyn talqylady.
Jıynǵa QR ınvestıtsııalar jáne damý vıtse-mınıstri Roman Sklıar men oblys ákimi Janseıit Túımebaev qatysty,-dep habarlaıdy QazAqparat tilshisi. Jıynda Ózbekstannyń Maqtaaral aýdanynyń terrıtorııasynda ornalasqan M-39 avtojolyn (887,8 shq. - 911,9 shq.)qaıta jańartyp paıdalaný jaıy qaralyp, atalǵan ýchaskeden ótkizý beketin salý máselesi sóz boldy. Atap aıtqanda, búgingi kúnge deıin 89 shaqyrym joldy júrip ótip, Tashkentten Samarqanǵa Jyzaq arqyly aınalyp ótip qatynaǵan turǵyndar endi 24,5 shaqyrymdy basyp ótip, maqsatty mekenge bara alatyn bolady.
«Avtojol qaıta jańaryp, paıdalanýǵa berilgende 65 shaqyrymdaı jol qysqarady. Bul qos memleket halyqtarynyń týystyq qarym-qatynastaryn odan ári nyǵaıtyp, aradaǵy saýda-sattyq pen týrızmdi damytýǵa múmkindik beredi. Sonymen qatar, Ózbekstan astanasy Tashkent pen Ońtústik Qazaqstan oblysynyń baılanysy kúsheıe túsedi degen úmittemin», - dedi QR Ózbekstan Respýblıkasyndaǵy Tótenshe jáne ókiletti elshisi Erik Myltyqbaıuly.
E.Ótembaevtyń aıtýynsha, shekaralyq aımaqta arnaıy beket salynyp, taýar aınalymyna baqylaý kúsheıgenimen, salyq salynbaıdy. Qaıta jańǵyrǵan avtojol 2017 jyldyń aqpan aıynda el ıgiligine beriledi dep kútilýde.
Al, tús aýa jumysshy top atalǵan joba boıynsha ekijaqty kelisimge kelip, arnaıy memorandýmǵa qol qoıdy. QR Investıtsııalar jáne damý vıtse-mınıstri R.Sklıar men Ózbekstan Respýblıkasy Syrtqy ister mınıstrliginiń aıryqsha tapsyrmalar boıynsha elshisi I.Nematovtyń arasynda túzilgen qujat halyqaralyq ekonomıkalyq baılanysty nyǵaıtyp, taýar aınalymyn jaqsartýǵa sep bolady degen senim bar. Atalǵan másele boıynsha Qazaqstan tarapynan jasalǵan jan-jaqty qoldaýlarǵa alǵysyn bildirgen ózbek elshisi bul qadamnyń kórshiles elderdiń yntymaqtastyǵyn arttyratyn jaqsy bastama ekenin atap ótti.
Eske sala keteıik, kórshiles memlekettiń Myrzashól arqyly ótetin M-39 avtojoly 2006 jyly jabylyp, jergilikti turǵyndardyń barys-kelisin qıyndatqan edi. Endi jańadan túzilgen memorandým bul máseleni ońtaıly sheship, qarym-qatynasty tereńdetetindigi anyq.
Almas Sultan
