Maqtaaraldaǵy jańa móltek aýdanda 31 úıdiń qurylysy tolyq aıaqtaldy
MAQTAARAL. QazAqparat – Túrkistan oblysynyń Maqtaaral aýdanyndaǵy jańa móltek aýdanda salynyp jatqan 31 úıdiń qurylysy tolyq aıaqtaldy. Baspanalardyń 25-i úkimet rezervinen, 6-y Nur Otan partııasynyń «Biz birgemiz» qory esebinen boı kótergen, dep habarlaıdy QazAqparat tilshisi.
Maqtaaral aýdandyq Cáýlet, qala qurylysy jáne qurylys bóliminiń basshysy Bıjan Anarbekovtiń aıtýynsha, tamyz aıynyń birinshi kúninde munda 100 úıdiń qurylysy tolyq aıaqtalady dep josparlanǵan. Qurylysty mejelengen kúnde bitirý maqsatynda qazirgi tańda shaǵyn aýdanda 209 úıdiń shatyry jabylyp, 166 úıdiń ishki-syrtqy árleý jumysy júrgizilýde. Jańa móltek aýdanda qurylys jumysy toqtaýsyz júrgizilip, 1359 qurylysshy túngi jáne kúndizgi aýysymda jumys istep júr.
«Móltek aýdanda jeke turǵyn úı qurylysynan bólek, 1 200 oryndyq mektep pen 280 oryndyq balabaqshanyń da qazandyq shuńqyryn qazý júrgizilýde. Qazirgi tańa eki nysanda 20-ǵa tarta aýyr tehnıka jumys istep júr. Budan bólek, móltek aýdandy ınfraqurylymmen qamtamasyz etý isi de birge júzege asyrylýda. Atap aıtsaq, aýyz sý tartý, gaz jelisin ornatý, káriz júıesin, jol salý , asfalt tóseý jumystary da júrgizilýde», - deıdi Bıjan Anarbekov.
Bul móltekaýdan aldaǵy bir aıdyń kóleminde jańa keıipke enbek. Ol úshin shaǵyn aýdandy qaq jaryp ótetin respýblıkalyq mańyzy bar joldyń eki betinen eni 40, uzyndyǵy 60 metrdi quraıtyn demalys alleıasy salynýda. Sondaı-aq, móltekaýdannyń kireberisindegi kanal boıynan da turǵyndar demalatyn shaǵyn saıabaqtyń qurylysy júrgizilip jatyr. Budan bólek, 25 tósek oryndy dárigerlik ambýlatorııa men medıtsınalyq tirek pýnkti eki aıda paıdalanýǵa berilmek.
