Maqtaaraldaǵy jaǵdaı kóktemgi dala jumystaryna bóget bolyp otyrǵan joq
MAQTAARAL. QazAqparat - Maqtaaral aýdanyndaǵy topan sýdan zardap shekken aımaqtardy retke keltirý jumystary kóktemgi dala jumystaryn nátıjeli júrgizý isine kedergi keltirip otyrǵan joq, dep habarlaıdy QazAqparat Túrkistan oblysy ákiminiń baspasóz qyzmetine silteme jasap.
Qazirdiń ózinde myrzashóldik sharýalar 60 myń 926 gektar egistik alqapqa túrli daqyldar otyrǵyzý jumystaryn júrgizýde. Búgin bul týraly Maqtaaral aýdandyq aýyl sharýashylyǵy bóliminiń basshysy Ǵalym Dúısenbekov málim etti.
Bólim basshysynyń aıtýynsha, Maqtaaral aýdanyndaǵy 5 aýyldy topan sý shaıýyna baılanysty jarııalanǵan tótenshe jaǵdaıǵa qaramastan josparly jumystar júıeli júzege asýda. Búginge deıin aýdanda 1689 gektarǵa dándi jáne burshaqty daqyldar, 42043 gektarǵa maqta, 9893 gektarǵa kartop, kókónis jáne baqsha daqyldary, 1620 gektarǵa mal azyqtyq, 449 gektar aýmaqqa kúrish daqyldary otyrǵyzylǵan.
«Aýdanda árbir gektardan túsetin ónim kólemin ulǵaıtý maqsatynda bir jerden eki ret ónim alý jumysy tıimdi júzege asyp otyr. Bıyldyń ózinde aýdanymyzda 84 sharýa qojalyǵy 349 gektar egistik alqapqa erte pisetin qyryqqabat daqylyn egip, karantınge qaramastan 5721 tonna qyryqqabat ónimin elimizdiń ózge aýmaqtary men TMD elderine eksporttaý jumystaryn júrgizýde. Atalǵan 84 sharýa qojalyǵynyń 10-y ónimin jınap, ekinshi ónimge baqsha daqyldaryn egý jumystaryn júrgizýde», - deıdi Ǵalym Myrzahanuly.
Jalpy sharýalardyń mol ónim alýyna sebep bolatyn faktorlardyń biri - memleket tarapynan beriletin járdem. Bıylǵy jyly maqtaaraldyq dıqandar «Qoldau.kz» saıty arqyly memlekettik járdemderdi (sýbsıdııalardy) alýda. Búgingi tańǵa jeńildetilgen baǵamen 20 myń tonna mıneraldy tyńaıtqysh berilgen. Kóktemgi dala jumystaryn júrgizý úshin 4160 myń tonnadaı janar-jaǵar maı bólinip, onyń 1335 tonnasy sharýalarǵa taratylǵan.
