Maqtaaraldaǵy úılerdiń qurylysy 1 tamyzda tolyq aıaqtalýy tıis – Ómirzaq Shókeev
TÚRKІSTAN. QazAqparat – Túrkistan oblysynyń ákimi Ómirzaq Shókeev tóraǵalyq etken kezekti lezdemelik jıynda Maqtaaral aýdanyndaǵy tótenshe jaǵdaıdyń saldaryn joıý máseleleri talqylandy. Aımaq basshysy jańadan salynyp jatqan turǵyn úılerdiń qurylysy óz merziminde, ıaǵnı, 1 tamyzda tolyq aıaqtaýdy tapsyrdy, dep habarlaıdy QazAqparat tilshisi.
«Óndiristik kestege saı baqylaý jumystaryn kúsheıtip, merdigerlermen tyǵyz qarym-qatynasta jumys jasaý kerek. Sondaı-aq, áleýmettik nysandardyń qurylysyna da nazardan tys qalmaýy qajet. Atalǵan jumystardyń óz merziminde aıaqtalýyna tikeleı jaýapty ekendikterińizdi eskertemin», – dedi Ómirzaq Estaıuly.
Aıta keteıik, Sardoba sý qoımasy bógetiniń buzylýy saldarynan oryn alǵan tótenshe jaǵdaıǵa baılanysty Maqtaaral aýdanynda 5 eldi mekende ornalasqan jalpy 866 turǵyn úı zardap shekken bolatyn. Jeńis, Jańaturmys, Dostyq eldimeken turǵyndarynyń kelisimi boıynsha, Myrzakent kentinde 386 jeke turǵyn úıdiń qurylysy júrgizilýde. Onyń ishinde 196 turǵyn úı memlekettik bıýdjet esebinen, qalǵan 190 turǵyn úı «B.Ótemuratov», «Salıqaly urpaq», «Biz Birgemiz» qorlary atynan salynýda.
Qurylys alańynda 1 550 jumysshy men 150 arnaıy tehnıka qurylys - montaj jumystaryna jumyldyrylǵan. 200-deı úıde qurylys jumystary aıaqtalýǵa jaqyn.
Tótenshe jaǵdaı nátıjesinde, Energetıka jáne turǵyn úı-kommýnaldyq sharýashylyq basqarmasy eki negizi baǵyt boıynsha jumys júrgizýde. Jańa turǵyn úı qurylysynda tolyq ınjenerlik ınfraqurylym salynyp jatyr. Sonymen qatar, Fırdaýsı jáne Órgebas eldimekenindegi sýmen jabdyqtaý júıelerin qalpyna keltirý jumystary júrgizilýde.
