Maqtaaraldaǵy sý tasqyny: QR SІM basshysy EO ókilderine kómek úshin alǵys aıtty
Búgin QR Syrtqy ister mınıstri Muhtar Tileýberdi «Ortalyq Azııa – Eýropalyq odaq» Mınıstrlik vıdeokonferentsııasyna qatysty.
Eýropalyq odaqtyń Syrtqy saıasat jáne qaýipsizdik jónindegi Joǵarǵy ókili - Eýropalyq komıssııanyń vıtse-prezıdenti Jozep Borrell men Ortalyq Azııanyń bes eliniń syrtqysaıası vedomstvolarynyń basshylary COVID-19 pandemııasynyń halyqaralyq saıası jáne ekonomıkalyq protsesterge áseri, sondaı-aq «Ortalyq Azııa - Eýropalyq odaq» formatynda ózara is-qımyldy tereńdetý perspektıvalaryn talqylady.
«J. Borrell Eýropalyq komıssııanyń Ortalyq Azııa boıynsha EO-nyń jańa strategııasy sheńberinde odan ári yntymaqtastyqty damytý jónindegi josparyn, sondaı-aq koronavırýs pandemııasymen jáne onyń saldarymen kúreske kómek kórsetý boıynsha «Team Europe» baǵdarlamasy aıasyndaǵy aýqymdy aqparatty usyndy. Aıta keterligi, bul paket Ortalyq Azııada koronavırýspen kúreske baǵyttalǵan 3 mln eýro somasynda Dúnıejúzilik densaýlyq saqtaý uıymymen birlesken jobalardy iske asyrýdy qamtıdy», - delingen QR SІM aqparatynda.
Sonymen qatar, Joǵary ókil Qazaqstannyń koronavırýsqa qarsy kúres jónindegi is-qımyldaryna, sondaı-aq QR Prezıdenti Q. Toqaevtyń bastamasymen iske qosylǵan odan ári demokratııalandyrý boıynsha reformalardy joǵary baǵalaǵan.
«M. Tileýberdi tótenshe jaǵdaı jáne karantın sharttarynda ekonomıkanyń turaqty ósýin qoldaý jáne el halqyn áleýmettik qoldaý boıynsha Qazaqstan Úkimetiniń atqarǵan jumystarynyń nátıjeleri týraly habardar etti. Mınıstr EO ókilderine Túrkistan oblysy Maqtaaral aýdanynda sý tasqynynan zardap shekkenderge kórsetken kómegi úshin alǵys bildirdi.
Kelissózder barysynda densaýlyq saqtaý jáne áleýmettik salalaryndaǵy ózekti máselelerdi sheshý boıynsha jemisti pikir almasý ótti. Sondaı-aq óńirlik yntymaqtastyqty jandandyrý boıynsha birlesken qadamdar qarastyryldy. Oǵan qosa, dıplomattar Ortalyq Azııanyń Eýroodaqpen ekonomıkalyq baılanystaryna pandemııanyń teris saldaryn azaıtý boıynsha birlesken is-qımyldardy úılestirýdi jalǵastyrýǵa ýaǵdalasty», - delingen baspasóz baıanynda.
