Maqtaaraldaǵy sý tasqyny: Ferdaýsı aýylynda úılerdiń qurylysy bastaldy
MAQTAARAL. QazAqparat – Maqtaaral aýdanyndaǵy topan sý shaıǵan Ferdaýsı aýylynda alǵashqy 10 úıdiń irgetasy qalandy. Búginde mundaǵy 141 otbasynyń árqaısysyna úkimet rezervinen 8,5 mln teńge aýdarylǵan, dep habarlaıdy QazAqparat tilshisi.
Atalǵan aýylda 150 úı buzylyp, 80 baspananyń irgetasyn qalaýǵa daıyndyq júrgizilýde. Bul jumystarǵa 470 jumysshy jumyldyrylǵan. Al, úkimetten beriletin qarajattyń 50 paıyzyn alǵan turǵyndar úı salýǵa qajetti qurylys zattaryn satyp alyp jatyr.
«Úıimniń irgetasyn kóterip qoıdym. Aqshamyz qolymyzǵa tıe sala, qurylys zattaryn satyp aldym. Úkimetimizge, oblys, aýdan basshylaryna, bizge jaýapty bop bekitilgen Keles aýdanynyń ákimdigine alǵysymyz sheksiz», - deıdi jergilikti turǵyndardyń biri Mýzafar Sharapov.
Budan bólek, aýylda úı aýlalaryn úıindiler men kúl-qoqystardan tazartý, úı salynatyn oryndardy tazalaý jumystary júrgizilýde. Oǵan ózbekstandyq 100 adam men 10-ǵa jýyq arnaıy tehnıkasy, Keles aýdanynan 30 adam men 6 tehnıka jumyldyrylǵan. Júıeli jumystardyń nátıjesinde aýyldaǵy 12 kósheden 180 tonna kúl-qoqys shyǵarylǵan.
