Maqtaaraldaǵy sý basyp qalǵan aýyldarda birneshe blokpost qoıyldy
MAQTAARAL. QazAqparat – Sý basyp qalǵan Maqtaaral aýdanyndaǵy aýyldarda birneshe blokpost qoıyldy. Oblys ákimdigi bul saqtyq sharalaryn uıymdastyrý úshin jasalyp jatqanyn túsindirdi, dep habarlaıdy QazAqparat tilshisi.
«Eńbekshi aýyldyq okrýgi jáne Jańa jol aýyldyq okrýgterinde ornalasqan Jeńis, Jańaturmys jáne Ferdoýsı eldimekenderine birneshe blokpost qoıyldy. Jańa jol aýyldyq okrýgi, Ferdoýsı aýylynda ornalasqan «Ferdoýsı» jalpy orta mektebiniń aýmaǵyna sý kóterilgen. Sonymen qatar 6 úıdiń aýlasyn sý basqan. Eldimekenniń ishki kollektorlaryna sý tolǵan. Jeńis eldimekenine kiretin negizgi kópirdi sý shaıyp ketken. Kópirdiń uzyndyǵy 10 metr. Qazirgi tańda «Nurly jol» eldimekeninde 28 gektar maqta alqabyn sý basqan. Oblystyq TJD oqıǵa ornynda jumys júrgizip jatyr», delingen habarlamada.
Sondaı-aq, sý basqan aýyldardaǵy mal jáne egistik, úı men áleýmettik nysandardyń naqty shyǵynyn anyqtaý maqsatynda oblys ákimdiginiń barlyq tıisti basqarma basshylary aýdanǵa barǵan. Qazirgi tańda tótenshe jaǵdaıdan keltirilgen shyǵyn kólemi eseptelip jatyr.
Eske sala keteıik, keshe Ózbekstanda Sardoba sý qoımasynyń bógeti jarylyp, eldi mekender, kommýnıkatsııalyq jeli, egistikke zaqym kelgen. Sonyń saldarynan Maqtaaral aýdanynyń eki aýylyn sý basty. Aýdanda 2 mamyrda túngi 00:00-de tótenshe jaǵdaı jarııalandy. Sý basqan aýyldardan 5 400 adam qaýipsiz jerge kóshirildi.
