Maqtaaraldaǵy sý basqan aýyldardan 931 bas mal óleksesi shyǵaryldy
MAQTAARAL. QazAqparat – Sý tasqyny bolǵan aımaq mal ólekselerinen tolyqtaı tazartyldy. Bul týraly oblystyq aýyl sharýashylyq basqarmasy veterınarııalyq sharalardy uıymdastyrý bóliminiń bas mamany Arman Taǵaev málimdedi, dep habarlaıdy QazAqparat tilshisi.
Óńirlik kommýnıkatsııalar qyzmetinde ótken brıfıngte bas maman topan sý basqan 5 aýylda mal aýrý túrleriniń taralý qaýipi joq ekenin atap ótti.
Onyń sózinshe, topan sý basqan aýyldardan jalpy 931 bas mal óleksesi shyǵarylǵan. Onyń 40-y iri qara, 876-sy ýaq mal, 9-y jylqy, 6-ýy túıe.
«Tótenshe jaǵdaıdan kelgen zardaptaryn joıý maqsatynda oblystyq aýyl sharýashylyǵy basqarmasy, Maqtaaral aýdandyq aýmaqtyq ınspektsııasy jáne Maqtaaral aýdandyq «Veterınarııalyq qyzmeti» ókilderinen arnaıy komıssııasy qurylǵan bolatyn. Jumys barysynda mal ólekseleriniń sany anyqtalyp, onyń kópshiligi Ózbekstannan aǵyp kelgeni belgili boldy. Qazirgi tańda maqtaaraldyqtardyń 46 bas aýyl sharýashylyǵy janýarlary men 98 bas úı qustary ólgeni anyqtalyp otyr. Ketken shyǵyn tolyǵymen eseptelip, nátıjesinde 10,6 mln teńge oblystyq qordan tóleý joldary qarastyrylýda» , – dedi A.Taǵaev.
Aıta keteıik, búgingi tańǵa topan sý shaıǵan aımaqtarda aýrýdyń taralýyn boldyrmaý maqsatynda 1 018,5 myń sharshy metr aýmaq zalalsyzdandyrylǵan. Bul jumystardy atqarýǵa barlyǵy 39 maman men 16 tehnıka jumyldyrylǵan. Sondaı-aq, aýdanda veterınarııalyq qaýipsizdikti qamtamasyz etý úshin ólekseden tazartylǵan aýmaqtardy 3 paıyz kaýstıkalyq sodamen zalalsyzdandyrý jumystary júrgizilýde.
