Maqtaaraldaǵy sý basqan aýyldardan 5400 adam qaýipsiz jerge kóshirildi
MAQTAARAL. QazAqparat – Túrkistan oblysy Maqtaaral aýdanynda sý basqan eldimekenderden turǵyndardy kóshirýge 450 polıtseı jumyldyryldy. Halyqty evakýatsııalaý úshin Maqtaaral, Jetisaı jáne Saryaǵash APB jeke quramy men Ulttyq ulannan 250 áskerı atsalysty, dep habarlaıdy QazAqparat tilshisi.
Oblystyq PD baspasóz qyzmetiniń málimetinshe, Myrzakent kentindegi №4 mektepte 2200 adamǵa arnalǵan evakopýnkt daıyndalǵan. Tehnogendik tótenshe jaǵdaı oryn alǵan aýmaqqa Túrkistan oblysy polıtsııa departamentiniń bastyǵy, polıtsııa general-maıory Qaırat Dálbekov te arnaıy keldi.
Qazirgi ýaqytta oqıǵa ornynan 5400 turǵyn evakýatsııalanǵan. Keıbireýleri ózderi kóship, basqalarǵa kómek kórsetken. Tártip saqshylary qoǵamdyq tártip pen azamattardyń qaýipsizdigin qamtamasyz etý boıynsha jumystar júrgizip, basqa da qajetti sharalar qabyldaýda.
Esterińizge sala keteıik, 1 mamyrda Sardoba sý qoımasy bógetin sý shaıyp ketýine baılanysty Ózbekstannyń Syrdarııa oblysyndaǵy eldimekendi sý basty.
Sonyń saldarynan Maqtaaral aýdanynda shekara mańyndaǵy birneshe kollektor sýǵa tolyp qalǵan. Maqtaaraldaǵy ortalyq kollektordan sý tógilip, Jeńis, Jańa turmys aýyldaryn sý alyp ketti. Oblystyq mańyzy bar «Myrzakent - Jeńis - Jańa turmys» avomobıl jolyn sý basyp, kólik júre almaýda.
Sondaı-aq Túrkistan oblysynda sý tasqyny qaýpi tóngen 3 aýyldyń halqy evakýatsııalanyp jatyr.
