Maqtaaraldaǵy mektepter jóndeý jumystarynan ótýde
MAQTAARAL. QazAqparat – Túrkistan oblysy, Maqtaaral aýdanyndaǵy mektepter jańa oqý jylyna tolyq daıyn bolady. Bul týraly aýdandyq bilim bóliminiń basshysy Muratbek Serikbaev aýdan ortalyǵynda ótken májilis barysynda aıtyp ótti, dep habarlaıdy QazAqparat tilshisi.
Muratbek Serikbaevtyń sózinshe, bilim berý uıymdaryn aǵymdaǵy jóndeý jumystaryna aýdandyq bıýdjetten 9 mln 906 myń teńge qarjy qaralǵan. Búgingi kúni jóndeý jumystary tolyǵymen aıaqtalyp otyr. Al, Jambyl aýyldyq okrýginde ornalasqan S.Muqanov atyndaǵy jalpy orta mektebin kúrdeli jóndeýden ótkizýge 160 mln 464 myń teńge jáne Myrzakentte ornalasqan Abylaıhan atyndaǵy jalpy orta mektebine 358 mln 934 myń teńge qarjy qaralǵan. Qos mektepte qurylys qyzý júrip jatyr.
«Oqýshylardy oqýlyqtarmen jáne oqý-ádistemelik keshenderimen tolyq qamtý úshin jergilikti bıýdjetten 268 mln 840 myń teńge qarjy bólingen. Oqýlyqtardy qaıta basyp shyǵarý kestesine sáıkes 11 baspamen 130 091 oqýlyqqa kelisim-sharttar túzilip, onyń 52,5 paıyzy tasymaldanǵan.Sáýir aıynda bilim berý uıymdarynyń jylý qazandyqtaryn retke keltirý, jylý júıelerin shaıý, tazalaý, gıdravlıkalyq synaqtan ótkizý jumystary júrgizilgen. Jumys barysynda 28 mekteptiń jylý júıelerinen aqaýlar anyqtalyp, aktiler túzildi. Anyqtalǵan kemshilikterdi joıý úshin aýdandyq bıýdjetten 5 mln 747 myń teńge qarjy qaralyp, merdiger anyqtalǵan. 1 qyrkúıekke deıin jylý júıeleri men jylý qazandyqtary tolyq daıyn bolady»,- dedi aýdandyq bilim bóliminiń basshysy.
Jıynda sondaı-aq, 6240 tonna qatty otynǵa konkýrs ótkizilip, merdiger anyqtalǵany aıtyldy. Mamandardyń sózinshe, búgingi kúnge deıin qatty otynnyń 4020 tonnasy tasymaldanǵan. Qalǵan 2220 tonna kómir aǵymdaǵy jyldyń 23 tamyzyna deıin jetkiziledi dep kútilýde.
Aıta keteıik, Maqtaaral aýdany boıynsha 2019-2020 oqý jylynda 1-11 synyp aralyǵynda 27 374 oqýshy bilim alady dep josparlanýda.
