Maqtaaraldaǵy qurylys jumystaryna jergilikti turǵyndar tartylýda
MAQTAARAL. QazAqparat – Túrkistan oblysynyń Maqtaaral aýdanynda tasqyn sýdan zardap shekken azamattarǵa baspana turǵyzý jumystary bastalyp ketti. Qazirdiń ózinde 40-tan astam qurylys kompanııasy Myrzakenttiń shyǵys betindegi 50 gektar jerge úılerdiń irgetasyn qalaýda, dep habarlaıdy QazAqparat tilshisi.
Túrkistan oblysynyń ákimi Ómirzaq Shókeevtiń tapsyrmasyna oraı turǵyn úılerdiń qurylysyna negizinen Maqtaaral aýdanynyń turǵyndary tartylýda. Bul sharalar tasqyn bolǵan eldi mekenderde jumyssyz júrgen jastardy eńbekpen qamtyp, áleýmettik jaǵdaıyn durystaý maqsatynda qolǵa alynýda. Myrzakent irgesinde baspana qurylysyn erte bastaǵan kompanııalardyń biri - «Stroıkonsaltıng» JShS. Búginde atalǵan kompanııada 40-tan astam jergilikti qurylysshy eńbek etip jatyr. Alǵashqy 10 úıdiń qurylysyn maýsym aıynyń sońyna deıin aıaqtaý josparlanyp otyr.
«10 úıdiń irgetasyn quıýǵa daıyndyqty bastap kettik. Salynatyn úı kólemi 100 sharshy metrdi qurasa, eni men uzyndyǵy - 11h11 metr. Búgin-erteń beton quıýǵa kirisemiz. Qurylys jumystaryna qajetti qol kúshin negizinen Maqtaaral aýdanynyń turǵyndarynan tartyp jatyrmyz. Qurylysshylarǵa jalaqy istegen jumys kólemine saı ári kezeń-kezeńimen toqtaýsyz tólenip otyratyn bolady. Eń bastysy maqsat - qurylysty sapaly aıaqtap, eldiń ystyq yqylasy men alǵysyna bólený», - deıdi kompanııa basshysy Talǵat Orazuly.
Myrzakent eldi mekeniniń turǵyny Erdos Basharov ta osynda alǵashqylardyń biri bolyp jumysqa ornalasqanyn aıtady. Ol osyndaı qıyn qystaý kezeńde jaqsy istiń basy-qasynda júrýdi azamattyq boryshym dep sanaıdy.
«Úkimet tasqyn sýdan zardap shekken maqtaaraldyqtarǵa arnap úı salyp berip jatqany qýantady. Osy istiń kýási bolyp otyrmyz. Bul rette, Maqtaaral aýdanynyń jumyssyz júrgen barlyq jastaryn qurylysqa atsalysýǵa shaqyramyn. Aılyq ýaqytyly tólenedi. Úsh mezgil tamaǵy da fırma atynan tegin qarastyrylǵan. Endeshe, úıde qarap otyrmaı, Myrzakentimizdiń ósip-órkendeýine bir kisideı atsalysaıyq», - deıdi Erdos Basharov.
Aıta keteıik, Myrzakenttiń shyǵys betindegi 50 gektar aımaqqa aldaǵy ýaqytta 500 turǵyn úı salynady dep josparlanýda. Búgin Úkimet basshysy Asqar Mamın saparmen kelip, alǵashqy úıdiń qazyǵyn qaqqan bolatyn.
