Maqtaaraldaǵy qurylys jumystaryna 800 jergilikti turǵyn tartyldy
MAQTAARAL. QazAqparat – Maqtaaral aýdanynda sý tasqynynan zardap shekken turǵyndardy jumyspen qamtý boıynsha jumystar úzdiksiz júrgizilip keledi. Búginde sý basqan eldimekenderdiń turǵyndaryna úı salyp jatqan qurylys kompanııalarynda 1475 azamat jumys isteýde, dep habarlaıdy QazAqparat tilshisi.
Jańa baspanalardyń qurylysy jumystaryna 800-den astam jergilikti turǵyn tartylǵan. Qazirgi sátte taǵy 43 bos jumys orny bar. Ol jumystarǵa da jergilikti turǵyndardy tartý josparlanýda. Maqtaaraldyqtardy jumyspen qamtý maqsatynda oblystyq jumyspen qamtýdy úılestirý jáne áleýmettik baǵdarlamalar basqarmasy tarapynan aýdan ortalyǵynda mobıldi ortalyqtar jumys isteýde. Birinshi mobıldi ortalyq Jańaturmys, Jeńis, Órgebas, Dostyq jáne Ferdoýsı aýyldarynyń turǵyndaryna qyzmet kórsetýde. Ekinshi top Nurlytań, Jaılybaev, Shuǵyla jáne Jantaqsaı aýyldarynda. Úshinshi ortalyqtyń qyzmetkerleri Myrzakent, Nurly jol, Araıly jáne Aqjol aýyldarynyń turǵyndaryn jumysqa ornalastyrýǵa qolǵabys etýde. Mamandar túsindirme jumystaryn júrgizip, azamattardan jumysqa ornalasýǵa ótinishter qabyldaýda.
Sonymen qatar, aýdan boıynsha Nátıjeli jumyspen qamtýdy jáne jappaı kásipkerlikti damytýdyń «Eńbek» memlekettik baǵdarlamasy sharalarymen 459 adam qamtylǵan. Onyń ishinde 85 azamat sý basqan eldi mekenderdiń turǵyndary bolyp tabylady.
