Maqtaaraldaǵy aýyldardan táýligine 20-25 tonna qoqys shyǵarylýda
MAQTAARAL. QazAqparat – Maqtaaral aýdanyndaǵy sý tasqynynan zardap shekken 5 aýylda sanıtarlyq tazalyq jumystary júrgizilýde. Topan sýdan qulaǵan úıler súrilip, aýmaq kúl-qoqystan tazartylýda, dep habarlaıdy QazAqparat tilshisi.
Saryaǵash aýdanyna bekitilgen Jańaturmys eldi mekeninde jalpy 4 arnaıy tehnıka men 30 qyzmetker jumyldyrylǵan. Olar aýyl kóshelerindegi tasqynnan jınalǵan qoqystar men turmystyq qaldyqtardy syrtqa shyǵarýmen aınalysyp jatyr. Tazalyq jumystaryna Jańaturmys eldi mekeniniń turǵyndary da belsene atsalysýda.
Sondaı-aq, saryaǵashtyqtar Dostyq eldimekenin de retke keltirýde. Atalǵan aýdan ákimdiginiń uıymdastyrýymen 20 qyzmetker 3 arnaıy tehnıkamen birqatar jumystardy atqarǵan. Al, Keles aýdanyna bekitilgen Fırdaýsı eldimekeninde 170 -ten asa úı arnaıy saraptamadan ótip, qıraǵan baspanalardy buzý jumystary jalǵasýda.
Qazirgi tańda orta eseppen táýligine 20-25 tonna qoqys shyǵarylýda. Aıta keteıik, tazartý jumystaryna tartylǵan 2377 azamattyń 1500-nan astamy evakýatsııalyq pýnktterge jaıǵasqan. Dál osyndaı jumystar Órgebas pen Jeńis aýyldarynda da jalǵasýda. Bul aımaqtardaǵy tazalyq jumystaryn Jetisaı men Shardara aýdandary júrgizýde.
