Maqtaaraldaǵy 5 mektepte IT-synyptar ashyldy

MAQTAARAL. QazAqparat – Túrkistan oblysy, Maqtaaral aýdanynda 5 mektepte IT synyp ashyldy. «Tsıfrlyq Qazaqstan» memlekettik baǵdarlamasyn jergilikti jerde oryndaý maqsatynda ashylyp otyrǵan synyptar maqtaaraldyq oqýshylardyń qazirgi zaman talabyna saı bilim alýyna múmkindik berip otyr, dep habarlaıdy QazAqparat tilshisi.

Aýdan ákimi Baqyt Asanov jańadan ashylyp otyrǵan IT synyptardyń lentasyn qııý úshin Abaı, Jambyl, O.Bapyshev, Úlgili, Ǵ.Músirepov jalpy orta mektepterine arnaıy bardy. Óńir basshysy aýyl balalarynyń ǵylymı-tehnıkalyq bilimdi shynaıy ómirde qoldanýyna, zamanaýı tehnologııalardy jetik bilýine jol ashyp otyrǵan jobany barlyq mektepterge endirý kerektigin basa aıtty. «IT synyptarda 8-16 jas aralyǵyndaǵy balalar baǵdarlamalaý jáne robot tehnıkasynyń negizderi týraly Eýropalyq bilim berý standarty boıynsha tereńdetilgen bilim alady. Bul bastama mektepterge fakýltatıvti pán retinde engizilip, elektıvti kýrs retinde júrgiziledi. Byltyr aýdanymyzda 3 mektep robototehnıkamen jabdyqtalǵan bolatyn. Mine, taǵy 5 mektep jabdyqtalyp, balalarymyzǵa barynsha jaǵdaı jasalyp otyr» - dedi Baqyt Asanov. Aıta keteıik, aǵymdaǵy jyly aýdannan 6 mektepten IT synyptaryn ashý úshin jergilikti bıýdjetten 34,2 mıllıon teńge qarjy qaralǵan bolatyn. Jyl sońyna deıin taǵy bir mektepte atalǵan synyp ashylady dep kútilýde. Jalpy aýdannyń bilim salasynda «Tsıfrlyq Qazaqstan» memlekettik baǵdarlamasyn iske asyrý boıynsha bilim uıalaryn sapaly ınternetpen jáne Wifi jelilerimen qamtý, derbes kompıýterlerdiń sanyn kóbeıtý boıynsha jumystar júrgizilip jatyr. Sondaı-aq, kundelik.kz elektrondy jýrnaly, «Bilimland» bilim berý platformasy, balabaqsha.snation.kz balalardy balabaqshaǵa onlaın kezekke qoıý, mektep.snation.kz oqýshylardy 1 synypqa onlaın qabyldaý, jumys.snation.kz bilim berý uıalaryna konkýrs arqyly jumysqa qabyldaý júıelerimen jumys jasaý jolǵa qoıylǵan.