Maqtaaralda traktor tirkemesin shyǵaratyn zaýyt iske qosyldy

MAQTAARAL. QazAqparat - Túrkistan oblysy Maqtaaral aýdanynda jylyna 70 traktor tirkemesin shyǵaratyn zaýyt iske qosyldy. Memlekettik grantpen aýdanda salynǵan zaýyttyń ashylý saltanatyna aýdan ákimi Baqyt Asanov pen elimizdiń túrli óńirlerinen kelgen aýyl sharýashylyǵy salasynyń ǵalymdary, kórshiles aýdandardyń kásipkerleri men sharýalary qatysty, dep habarlaıdy QazAqparat tilshisi.

Jıynǵa qatysýshylar zamanaýı úlgidegi jańa tirkemelerdiń jasalý protsesin kórip, qurastyrý tsehtaryn aralap, zaýyt jumysymen tanysty. Onda zaýyt qojaıyny Nurlan Nurbekov memleketten 225 mıllıon teńge grant jeńip alǵanyn ári óz ıdeıasynyń halyqqa tıimdi ekenin baıandap ótti. Sol arqyly agrarly aımaqqa qajetti tirkemelerdi sharýalarǵa tıimdi baǵada shyǵarýdy kózdegenin atap ótti. Óz kezeginde sóz alǵan aýdan basshysy da qazirgi qoldanysta júrgen traktorlardyń 65 paıyzy, kombaındardyń 46 paıyzynyń paıdalaný merzimi 17 jyldan asqanyn aıtty.

«Traktorlardyń 15 paıyzy qazirdiń ózinde isten shyqsa, 26 paıyzynyń paıdalaný merzimi aıaqtalýǵa jaqyn. Kombaındar jáne basqa da qosalqy tehnıkalardyń jaǵdaıy da osyndaı. Al, eski tehnıkalardy paıdalaný shyǵyndy kóbeıtedi jáne egindi tolyq jınap alýǵa múmkindik bermeıtini aıdan anyq. Osy olqylyqtardy joıý úshin memleket tarapynan tehnıka jasaýshy otandyq kásiporyndardy qoldaý sharalary belgilendi. Solardyń qatarynda otandyq tehnıka jasaýshylarǵa óz ónimderin aýylsharýashylyq taýarlaryn óndirýshilerge arzandatyp satý úshin sýbsıdııalar berý, qosymsha qun salyǵynan jeńildikter jasaý, granttar berý sııaqty jumystar atqarylýda. Mine, memleket tarapynan berilgen osyndaı kómektiń arqasynda aýdanymyzda traktordyń tirkemelerin shyǵaratyn shaǵyn zaýytty iske qosyp otyrmyz» - dedi aýdan ákimi Baqyt Asanov.

Búginde shaǵyn zaýytta 16 adam turaqty jumyspen qamtylǵan. 3D qondyrǵylardyń arqasynda qajetti torly symdar men qańyltyr jasap shyǵarylyp, kólemi 8 tonnadan asa júk sııatyn traktor tirkemeleri qurastyrylýda. Qazirdiń ózinde kásiporyn 10 traktor tirkemesine tapsyrys alǵan. Sondaı-aq, aýyl sharýashylyǵyna qajetti soqalar men tyrmalarǵa jáne taǵy da basqa tehnıkalarǵa qajetti qosalqy bólshekterdi jasaý úshin de shetelden ákelingen qondyrǵylardyń paıdasy zor.

Zaýyt basshysynyń aıtýynsha, aldaǵy ýaqytta taǵy on adamdy jumysqa qabyldap, tirkemeler sanyn arttyrý josparlanyp otyr. Endi shaǵyn zaýyttyń arqasynda aýyl sharýashylyǵy tehnıkalaryn jóndeýden ótkizip, eskilerin qaıta qalpyna keltirýge bolady.