Maqtaaralda Tótenshe jaǵdaı saldaryn joıý jumystary qalaı júrip jatyr
NUR-SULTAN. QazAqparat – Túrkistan oblysy Maqtaaral aýdanynda TJ saldaryn joıý jumystarynyń barysy baıandaldy, dep habarlaıdy QazAqparat.
«Jedel shtabtyń sheshimi boıynsha 7 mamyrda QR ІІM TJ komıtetiniń barsha kúshi eldi mekendi sýdan qurǵatý úshin Órgebas aýylyna baǵyttaldy. Sý basqan eldi mekenderde jınalǵan sý Órgebas aýyly tóńiregine qaraı aǵylýda. Sondyqtan jasaq kúshteri men jabdyqtardy atalǵan aýylǵa qaraı kóshirý sheshimi qabyldandy. Qazirgi ýaqytta nasostar arqyly 1 mln tekshe metrden astam sý shyǵaryldy», - delingen QR ІІM TJ komıteti málimetinde.
Sonymen qatar, bul jumystarǵa Ózbekstan qutqarýshylary da jumyldyrylǵan.
Nurlyjol, Jańaturmys, Jeńis, Dostyq aýyldarynda ІІM kúshimen sýdan qurǵatý, sondaı-aq jeke zattardy, qujattar men múlikti evakýatsııalaý jumystary júrip jatyr.
TJ saldaryn joıý sharalaryna qutqarýshylar, áskerı qyzmetshiler, polıtseıler, jergilikti atqarýshy organdardyń qyzmetkerleri men volonterlar jumyldyrylǵan. Jalpy, 1300 adam, 220 tehnıka, 15 júzý qurylǵysy men 46 motopompa tartyldy.
Budan bólek, apattyq-qutqarý jumystaryna 205 adam, 38 tehnıka men 85 motopompa alyp kelgen Ózbekstan Tótenshe jaǵdaılar mınıstrliginiń qurylymy qatysýda.
7 mamyr tańerteń tótenshe jaǵdaı saldaryn joıý sharalaryna Nur-Sultan qalasy men Qaraǵandy oblysy TJ departamentteriniń qosymsha kúshteri jolǵa shyqty.
