Maqtaaralda tasqynnan zardap shekken aýyldarda sý deńgeıi tómendedi
MAQTAARAL. QazAqparat - Maqtaaral aýdanyndaǵy sý basqan Jeńis, Nurly jol, Jańa turmys, Fırdaýsı, Órgebas jáne Dostyq eldi mekenderi aýmaǵynan 8767 tekshe metr sý shyǵaryldy. Úzdiksiz sý tartyp shyǵarý nátıjesinde avtojoldar sýdan tazardy, dep habarlaıdy QazAqparat óńirlik kommýnıkatsııalar qyzmetine silteme jasap.
Sý deńgeıi Jańa turmys jáne Jeńis aýyldarynda 6 sm tómendep, 44 santımetrdi qurasa, Fırdaýsı jáne Dostyq aýyldarynda sý 9 sm kemip, qazir 35 sm deńgeıinde. Al Órgebas aýylynda «Kazsýshar» málimetine sáıkes, sýdyń qaıtýyna baılanysty deńgeıin qadaǵalaý toqtatylǵan.
Sonymen qatar, sý basqan aımaqtaǵy 3 myńnan asa úıden zattar shyǵarylyp, ıelerine tapsyryldy. Sondaı-aq, sýdan 924 mal óleksesi shyǵaryldy.
Jalpy sý basqan aýyldarda apattyq-qutqarý jumystaryna 1626 adam, 17 júzý qurylǵysy, 324 tehnıka, 217 sý sorǵy jumyldyrylǵan.
