Maqtaaralda taǵy úsh aýyldyń halqy kóshiriletini eskertildi - aýdan ákimdigi
MAQTAARAL. QazAqparat – Maqtaaralda «Tashkent-Termez» tas jolyn sý basyp qaldy. Alda úsh aýyldyń halqy kóshirilýi múmkin. Aýdan ákimdigi Facebook-tegi paraqshasynda osylaı eskertti, dep habarlaıdy QazAqparat tilshisi.
«Búgingi tańda aýdandaǵy Órgebas aýylyn sý basyp, sý deńgeıi M-39 ««Tashkent-Termez» trassasynyń boıyna jaıyldy. Sonymen qatar, ishki kanaldar arqyly trassynyń kelesi betine sý jiberildi. Aldaǵy ýaqytta J.Nurlybaev aýyldyq okrýgine qarasty Yrysty men Qaraqyr jáne Dostyq aýyldyq okrýgine qarasty Gúlistan aýylynyń turǵyndary sý basqan jaǵdaıda kóshýge daıyn bolý kerektigin eskertemiz. Osyǵan oraı, maldy qaýipsiz jerge kóshirip, ózderińizben birge qujattar, jyly kıim, baǵaly zattar jáne kerekti zattaryńyzdy daıyndap, evakýatsııaǵa daıyn bolýyńyzdy suraımyz», delingen habarlamada.
Aıta keteıik, qazir Ózbekstannan kelgen tasqyn sý aýdannyń birneshe eldimekenderin alyp ketti. Ondaǵy turǵyndar qaýipsiz jerlerge kóshirilip, 22 evkýatsııalyq orynǵa ornalastyrylǵan. Al, keshe túnde aýdan ortalyǵy Myrzakent kentiniń turǵyndary shuǵyl túrde Atakentke kóshirilgen edi. Artynsha Órgebas aýylyn sý basyp, onda da evýakýatsııa sharalary júrgizildi.
