Maqtaaralda sybaılas jemqorlyqtyń aldyn alý máseleleri talqylandy
Aýdanǵa arnaıy kelgen QR Sybaılas jemqorlyqqa qarsy is-qımyl agenttiginiń Túrkistan oblysy boıynsha departamenti Saryaǵash aımaǵy boıynsha aýdanaralyq basqarmasynyń basshysy Saparǵalı Jantóreev bilim salasynyń qyzmetkerlerimen májilis ótkizdi.
Aýdan ákiminiń orynbasary Beısenbaı Tórebekov tóraǵalyq etken jıynǵa memlekettik qyzmetshiler men mektep dırektorlary jáne BAQ ókilderi qatysty. Jıynda sóz alǵan aýdan ákiminiń orynbasary sybaılas jemqorlyqtyń aldyn-alý boıynsha mektep dırektorlarymen birlese aıyna bir retten kem emes jınalys ótkizý kerektigin usyndy. Al, basqarma basshysy Saparǵalı Jantóreev sybaılas jemqorlyqtyń aldyn alýdy ár adam ózinen bastaý kerektigin aıtty.
«Balalarǵa úlgi bolarlyqtaı ustaz bolsańyzdar, áriptesterińizdiń arasynda adal qyzmet atqarsańyzdar - osynyń ózi jetkilikti. Qazirgi tańda Prezıdentimiz sybaılas jemqorlyqpen kúres máselesin kún tártibinen túsirmeı otyr, ol degenimiz sybaılas jemqorlyqpen kúres qarqyndaı beredi degen sóz» - dedi Saryaǵash aımaǵy boıynsha aýdanaralyq basqarma basshysy. Jıyn barysynda basqarma basshysyna usynys-pikirler aıtylyp, jıynǵa qatysýshylar tarapynan suraqtar qoıyldy. Saparǵalı Jantóreev qoıylǵan suraqtarǵa zań aıasynda jaýap berip, keı usynystardy qoldaıtynyn aıtty.
Munan soń jıyndy qortyndylaǵan aýdan ákiminiń orynbasary Beısenbaı Tórebekov quzyrly organdar Maqtaaral aýdanynda sybaılas jemqorlyq boıynsha faktiler anyqtap jatqanyn jáne ol boıynsha jaýaptylarǵa tártiptik shara kóriletindigin atap ótti.
Sondaı-aq, sybaılas jemqorlyqtyń aldyn alýǵa baǵyttalǵan mundaı is-sharalar kúsheıe beretinin eskertti.