Maqtaaralda sý tasqynynan zardap shekkenderge 500 volonter kómektesip júr
Túrkistan oblystyq qoǵamdyq damý basqarmasynyń basshysy Damır Júnisov jáne «Nur Otan» partııasy oblystyq fılıaly tóraǵasynyń birinshi orynbasary Beısen Tájibaev Maqtaaral aýdanynda jumys istep júrgen eriktilermen kezdesti. Olar basqosýda volonterlerdiń jumysymen tanysyp, aldaǵy ýaqytta atqarylatyn sharýalardy túsindirdi.
Aýdanda oryn alǵan tótenshe jaǵdaıǵa baılanysty oblystyq qoǵamdyq damý basqarmasy men «Nur Otan» partııasy oblystyq fılıalynyń uıymdastyrýymen Jastar ortalyǵynyń janynan «Birgemiz, Maqtaaral» volonterler shtaby qurylǵan. Shtab jetekshisi - «Jastar resýrstyq ortalyǵy» KMM dırektory Amalbek Ómirtaı.
«Maqtaaral aýdanyndaǵy tasqyn sý saldarynan qıyn jaǵdaıda qalǵan aýyl azamattaryna kómektesý jáne tótenshe jaǵdaıdan kelgen zardaptardy joıý jumystaryna jalpy 500-deı erikti atsalysýda. Onyń 150-ge jýyǵy turaqty túrde kómek kórsetip keledi. Eriktiler Jambyl aýyldyq okrýgindegi №36 jalpy orta mektebine jaıǵastyrylyp, olardyń jumys isteýine qolaıly jaǵdaı jasaldy. Qazirgi tańda volonterlar oblystyq tótenshe jaǵdaı shtaby tarapynan uıymdastyrylǵan barlyq jumystarǵa atsalysýda. Atap aıtqanda, tasqyn sýda qalǵan aýyl azamattaryn evakýatsııalyq beketterge ornalastyrý, gýmanıtarlyq kómekke kelgen taýardy tasymaldaý, muqtaj azamattarǵa úlestirý sııaqty sharýalardy atqarýda», – dedi A.Ómirtaı.
Aýdandaǵy aýyldardy tasqyn sý basýyna baılanysty jalpy 31 myńnan astam azamat qaýipsiz aımaqqa evakýatsııalansa, bul jumysta da eriktilerdiń úlesi bar.
«Volonterlik jumystarǵa «Jas Otan» jastar qanatynyń músheleri de belsene qatysýda. Eriktiler evakýatsııalyq beketterde kúsh qurylymdarynyń sharýasyna da kómektesip jatyr. Tótenshe jaǵdaı oryn alǵan alǵashqy kúnderde jergilikti aýyl jastarynan uıymdastyrylǵan volonterlyq toptar 12 shaqyrym qorǵanys bógetterin turǵyzýǵa atsalysty. Sonymen qatar, olar mádenıet, qoǵam qaıratkerlerimen birigip, turǵyndardy sabyrǵa shaqyrý jumystaryna da belsene aralasýda», – deıdi oblystyq «Jas Otan» jastar qanatynyń tóraǵasy Janserik Juman.
Budan bólek, Shymkent, Nýr-Sýltan, Almaty qalalarynyń jastary men volonterlyq uıymdardan, respýblıkalyq «Jas Otan» jastar qanatynan gýmanıtarlyq kómekter kelýde. Búgingi tańda volonterlerdiń kúshimen 10 myńnan astam medıtsınalyq maska men antıseptıkalyq qural taratyp berildi.
