Maqtaaralda sý tasqynynan zardap shekken áleýmettik nysandar jańadan salynady
MAQTAARAL. QazAqparat – Túrkistan oblysynyń ákimi Ómirzaq Shókeevtiń tóraǵalyǵymen ótken lezdemelik májiliste apat saldaryn joıyp, qalpyna keltirý jumystarynyń barysy baıandaldy. Óńir basshysy Myrzakent kentindegi jańadan boı kótergen yqshamaýdanda ortalyq alań salý qajettigin aıtty, dep habarlaıdy QazAqparat tilshisi.
«Maqtaaral aýdanyndaǵy tótenshe jaǵdaıdan zardap shekken áleýmettik nysandar jańadan salynady. Fırdaýsı jáne Órgebas eldimekenderi men Myrzakent kentinde zamanaýı feldsherlik-akýsherlik pýnktiniń qurylysy men 1200 oryndyq mektep, polıtsııa tirek pýnkti jáne 280 oryndyq balabaqsha qurylysy bastalady. Bul maqsatta oblys ákimdigi rezervinen qarjy qarastyrylady»,- dedi Ómirzaq Shókeev.
Aıta keteıik, búginde tasqynnan zardap shekken Jeńis, Jańaturmys, Dostyq eldimekenderiniń turǵyndary úshin Myrzakent kentinde 425 jeke turǵyn úıdiń qurylysy júrip jatyr. Onyń ishinde 235 turǵyn úı memlekettik bıýdjet esebinen salynýda. Al, qalǵan 190 turǵyn úıdiń 150-i - B.Ótemuratov, 20 úı - «Salıqaly urpaq», 20 úı - «Birgemiz» qory esebinen boı kóterýde.
Jıynǵa qatysqan mamandar sý basqan aýmaqta 839 turǵyn úıge akkredıttelgen sarapshylar tehnıkalyq zertteý júrgizip, 623 úıge tehnıkalyq qorytyndy alynǵanyn aıtady. Qazirgi tańda jalpy sany 32 merdiger 383 turǵyn úıdiń qurylys-montaj jumystaryn júrgizip jatyr.
Qurylys aýmaǵynda 360 úıdiń irgetasy quıylǵan. 30 úıdiń qabyrǵa qalaý jumystary jalǵasýda. Jumysqa 1124 adam men 68 arnaıy tehnıka jumyldyrylǵan.
