Maqtaaralda sý tasqynynan zardap shekken 1,8 myń oqýshy lagerlerde demalady - BǴM
NUR-SULTAN. QazAqparat – Túrkistan oblysynda zardap sheken balalardy saýyqtyrý, olardyń bilim alýyna jaǵdaı jasaý jáne UBT-ǵa daıyndalýyna kómektesý boıynsha tıisti jumystar atqarylyp jatyr, dep habarlaıdy QazAqparat QR BǴM baspasóz qyzmetine silteme jasap.
«Qazaqstan Prezıdenti Qasym-Jomart Toqaev Maqtaaral aýdanynda sý tasqynynan zardap shekken turǵyndarǵa jan-jaqty kómek pen qoldaý kórsetýdi mindettedi. Úkimet basshysy Prezıdent tapsyrmalarynyń oryndalýyn qamtamasyz etý aıasynda maqtaaraldyq balalardy saýyqtyrý jumystaryn qolǵa alýdy tapsyrǵan bolatyn.
Túrkistan oblysynda zardap sheken balalardy saýyqtyrý, olardyń bilim alýyna jaǵdaı jasaý jáne UBT-ǵa daıyndalýyna kómektesý boıynsha tıisti jumystar atqarylyp jatyr. Búgin QR Bilim jáne ǵylym mınıstrliginiń apparattyq jınalysynda Memleket basshysy mindettegen tapsyrmalardyń oryndalý barysy pysyqtaldy», delingen habarlamada.
Mınıstrliktiń málimetinshe, Maqtaaral aýdanynda sý tasqynynan zardap shekken Jeńis, Nurly jol, Jańa turmys, Órgebas, Fırdoýsı eldi mekenderinde mektep jasyndaǵy 1 820 bala bar.
«Olardyń basym bóligi «Baldáýren» respýblıkalyq oqý-saýyqtyrý ortalyǵyna barady. Ol úshin karantın kezinde jumysyn toqtatqan ortalyqtyń qyzmetin jandandyrý týraly sheshim qabyldandy. Qalǵany «Erkejan», «Báısheshek», «Saryaǵash», «Qazyǵurt» «Baldáýren» (jekemenshik) lagerlerine jiberiledi. Sondaı-aq, óńirdegi joǵary oqý oryndarynyń jataqhanalarynda balalarǵa oqý saýyqtyrý jumystary uıymdastyrylady. Onda balalar sabaq oqyp, tamaqtanyp, demalady», delingen habarlamada.
Baspasóz qyzmetiniń habarlaýynsha, maqtaaraldyq balalardyń jaǵdaıyn Bilim jáne ǵylym mınıstrliginiń Balalar quqyqtaryn qorǵaý komıteti men óńirdegi Bilim basqarmasy jiti nazarda ustap otyr.
