Maqtaaralda sý basqan úılerdi qalpyna keltirý: Depýtattar usynys aıtty
NUR-SULTAN. QazAqparat – Parlament Májilisiniń jalpy otyrysynda Maqtaaral aýdanynda sý basqan turǵyn úılerge kelgen zalaldy baǵalaý júıesine qatysty usynystar aıtyldy. Osy oraıda Úkimet basshysy Asqar Mamınniń atyna depýtattyq saýal joldandy, dep habarlaıdy QazAqparat tilshisi.
«Barshańyzǵa belgili bolǵandaı, Ózbekstannyń aýmaǵynda ornalasqan «Sardoba» sý qoımasy bógetiniń buzylýy saldarynan Maqtaaral aýdanynyń birqatar eldi mekenderi sý astynda qaldy. Búgingi tańda resmı derekter boıynsha aýdannyń 10 eldi mekeni, 800-den asa turǵyn úıleri, 3 mektep, 5 balabaqsha, 4 medıtsınalyq nysan sý astynda qalyp, 31 myńnan astam turǵyn evakýatsııalandy. Qazirdiń ózinde kóktem kezinde eńbegi janatyn dıqan-fermerlerdiń 7600 gektarǵa jýyq aýmaqtaǵy daqyldy egin alqabyn sý basty. Memleket basshysy Qasym-Jomart Kemeluly Toqaev sý basqan aýyldardyń turǵyndaryna jan-jaqty materıaldyq kómek kórsetý týraly Úkimetke tapsyrma berip, Túrkistan oblysynyń birde-bir turǵyny nazardan tys qalmaıtynyn aıtty. Prezıdent tapsyrmasyn oryndaýda Úkimet jedel sharalar qabyldady. Apattyń alǵashqy kúninen bastap óńirde jedel shtab quryldy», - dep toqtaldy depýtat Qudaıbergen Erjan.
Osy oraıda ol qabyldanyp otyrǵan sharalarǵa usynys aıtty.
«Úkimettik komıssııa sý alǵan turǵyn úılerge kelgen zalaldy baǵalaýda tek úıdiń salynǵan materıalyna ǵana emes, úıdiń tekshe metr kólemi men turǵyndar sanyn negizge alýyn suraımyz. Keıbir turǵyndardyń óz múlikterin rásimdep úlgermegenderi de bolady. Osy jaǵdaıdy eskerý qajet. Jerasty sýlarynyń jaqyn ornalasqanyn eskere otyryp, sý basqan jerlerdi babyna keltirý maqsatynda drenaj júıelerin qoldanýdy qajet dep sanaımyz. Dıqandarǵa egindi qaıta egýge qoldaý joldaryn qarastyra otyryp, onyń ishinde aýylsharýashylyq tehnıka, janar-jaǵarmaımen jedel qamtamasyz etetin jáne olarǵa egistik alqaptarda ýaqytsha panalaýǵa múmkinshilik jasaý kerek. Sonymen birge, dıqandarmen aqyldasa otyryp, qysqa merzimde ónim beretin daqyldardy egýdi jáne oǵan kerekti tuqymdardy jetkizip berýdi, keıinnen alynǵan ónimniń satylýyna baılanysty sharalardy iske asyrý kerek dep sanaımyz», - dedi depýtat.
Sonymen qatar ol qazirgi karantın jaǵdaıyn eskere kele, turǵyndarǵa medıtsınalyq kómek berý máselesine asa joǵary mán berý kerektigin aıtty.
