Maqtaaralda shildeniń birinshi kúni 55 úıdiń qurylysy aıaqtalady
TÚRKІSTAN. QazAqparat – Maqtaaral aýdanynda topan sýdan shardap shekken úsh aýyldyń turǵyndaryna salynyp jatqan jańa móltek aýdannyń qurylysy qarqyndy. Munda qazirgi tańda 386 úıdiń qurylysy júrgizilýde, dep habarlaıdy QazAqparat tilshisi.
Myrzakent aýylynda salynyp jatqan móltekaýdanda búginde 46 úıde ishki árleý, 54-inde shatyr jabý, 239-ynda qabyrǵa qalaý jumystary júrgizilýde. Al, 77-sinde birinshi jappasyn jabý, 10-ynda irgetasyn qalaý jumystary jalǵasýda. Jańadan salynyp jatqan 386 úıdiń 196-sy úkimettik rezervten, al 190-y qorlar esebinen boı kóterýde.
«Aldaǵy 1-shi shilde kúni 55 úıdiń qurylysy tolyq aıaqtalyp, 100 úıdiń shatyry jabylyp bitedi dep josparlap otyrmyz. Qurylys qarqyny bir sátke de báseńdep otyrǵan joq. Merdiger mekemeler eki kezeńde jumys isteýde. ıAǵnı, kúndizgi jáne túngi aýysymda jumystaryn jalǵastyrýda. Ázirge qurylys materıaldarynan nemese qurylysshylardan tapshylyq oryn alyp otyrǵan joq»,- deıdi Maqtaaral aýdandyq sáýlet, qala qurylysy jáne qurylys bóliminiń basshysy Bıjan Anarbekov.
Jańa móltekaýdandaǵy 70 gektar aýmaqta turǵyn úı qurylysynan bólek, ınfraqurylymdyq ıaǵnı gaz, sý, jol, jaryq tartý jumystary qatar júrgizilýde. Sondaı-aq, 1200 oryndyq mektep pen 280 oryndyq balabaqshanyń ornyn ázirleý jumystary jalǵasýda. Aıta keteıik, jańa móltekaýdanda 31 merdiger kompanııa men onyń 1507 qurylysshysy eńbek etýde. Ózderine tıesili úılerdiń qurylysyn júrgizýde jetisaılyq «Núri-L- Jetisaı» qurylys kompanııasy aldyńǵy qatarda keledi. Olar qazirdiń ózinde 9 úıdiń ishki árleý jumystaryn bitirýge taıaý. Jalpy atalǵan kompanııa osyndaǵy 20 úıdiń qurylysyn júrgizý quqyǵyn ıelengen bolatyn. Búginde merdiger kompanııada 110 qurylysshy men 20-ǵa tarta tehnıka toqtaýsyz jumys isteýde.
