Maqtaaralda sarbazdar órtengen kólik ishinde qalǵan júrgizýshini qutqardy
MAQTAARAL. QazAqparat – Sý tasqynynan zardap shekken Maqtaaral aýdanynda sarbazdar órtengen kólik ishinde qalǵan júrgizýshini qutqardy. Tehnogendik apat saldaryn joıýǵa kelgen áskerıler osylaısha kúndelikti jergilikti turǵyndarǵa qolǵabys etip keledi, habarlaıdy QazAqparat tilshisi.
Atap aıtqanda, Shymkent qalasynyń 6506 áskerı bólimi qyzmetkerlerinen quralǵan jasaq tańǵy 4-5 shamasynda Myrzakent aýylynda patrýlde júrip, turǵyn úılerdiń birinen gaz ballonynyń jarylǵanyna kýá bolady. Olar tez arada órt bastalǵan úıdiń esigin ashyp, ishine kirgen. Alaıda úı ıesiniń joqtyǵyn kórip, kórshilerine habar beredi. Kezekshi aǵa leıtenant Serik Qudaıbergenov órt bolǵan jerge ýchaskelik polıtsııa qyzmetkerin jáne órt sóndirýshiler komandasyn shaqyrtady. Tilsiz jaý aýyzdyqtaldy. Bul sarbazdardyń kúndelikti basynan ótkizip jatqan oqıǵalardyń bir parasy ǵana. Al, uzynaǵashtyq 28237 áskerı bóliminiń jedel mehanızatsııalanǵan jasaǵynyń sarbazdary gaz qurylǵysymen jabdyqtalǵan Mersedes avtokóliginen órt shyqqanyn baıqaǵan. Olar kólik ishinde qalǵan júrgizýshini shuǵyl shyǵaryp úlgergen. Osyndaı árekettiń arqasynda kólik ıesi zardap shekken joq. Bul beıtit kúnniń batyrlary – maıor Jumabekov Baýyrjan jáne qatardaǵy jaýynger Nýrı Baǵlan.
Atap óteıik, qazirgi tańda Maqtaaral aýdanyndaǵy sý basqan aımaqta apattyń saldaryn joıýǵa 1626 adam jumyldyrylyp, 324 tehnıka men 17 qaıyq, 217 motopompa paıdalanylýda.
