Maqtaaralda salynyp jatqan shaǵynaýdannyń qurylysyna 600 adam tartylǵan
MAQTAARAL. QazAqparat – Maqtaaral aýdanynda jańadan salynyp jatqan móltekaýdannyń qurylysyna 600 adam tartylǵan. Bul týraly oblys ákimi Ómirzaq Shókeevtiń qatysýymen ótken jıynda aıtyldy, dep habarlaıdy QazAqparat tilshisi.
Aımaq basshysyna aýdandaǵy tótenshe jaǵdaı saldaryn joıý jumystarynyń barysyn baıandaǵan sala basshylary jańadan irgesi qalanǵan yqsham aýdanda táýlik boıy qurylys jumystary júrip jatqanyn jetkizdi.
Qurylys alańyna tartylǵan jumysshylardyń basym bóligi - Jetisaı men Maqtaaral aýdanynyń turǵyndary. Mamandardyń aıtýynsha, aýdanda sý alǵan úıler men mal basy, egistik alqaptarynyń qujattary jınaqtalýda. Olarǵa saraptama jumystary júrgizilip jatyr. Zardap shekken úılerdi baǵalaý jumystaryn arnaıy qurylǵan komıssııa anyqtaıdy.
Budan ózge jıynda zardap shegýshilerge jetkizilgen gýmanıtarlyq kómekterdiń barysy da aıtyldy. Búgingi kúnge Maqtaaral aýdanyna Nur-Sultan, Almaty, Shymkent qalalary men Qyzylorda, Pavlodar, Atyraý, Jambyl, Shyǵys Qazaqstan oblystarynan qaıyrymdylyq kómek kelgen.
Nátıjesinde oblystyq shtab qoımasyna 408 tonnadan astam gýmanıtarlyq kómek jınalǵan. Al, turǵyndar tarapynan turmysqa qajetti qysqa tolqyndy pesh, útik, teledıdar, tońazytqysh, kir jýý mashınalaryna tapsyrystar kóptep túsýde.
