Maqtaaralda polıtseıler toıdyń ústinen túsip, qonaqtardy tarqatty

MAQTAARAL. QazAqparat - Túrkistan oblysynyń polıtseıleri karantındegi kezekti toıdy toqtatty, dep habarlaıdy QazAqparat oblystyq polıtsııa departamentine silteme jasap.

Maqtaaral APB qyzmetkerleri men Maqtaaral aýdany ákimdigi birlesip, reıd júrgizýde. Kezekti reıd kezinde mobıldi top músheleri aýdan aýmaǵynda tamaqtaný oryndarynda, saýda úılerinde, azyq-túlik dúkenderinde sanıtarlyq talaptar men betperdelik rejıminiń saqtalýyn qadaǵalaýda.

Osy tusta karantın talaptaryna nemquraıdy qarap, sanıtarlyq normalardy buzǵan azamattarǵa túsindirme jumystary júrgizilip, hattama toltyryldy.

Qazirgi tańda Maqtaaral aýdanynda karantın talabyn oryndamaǵan 270 azamat anyqtalǵan. Onyń basym kópshiligi - belgilengen ýaqyttan keıin de jumys jasap turǵan dúken, oıynhana jáne toıhana ıeleri.

Mysaly, ýchaskelik polıtsııa ınspektory saǵat 13:00 shamasynda Maqtaaral aýdany, Atakent aýylyndaǵy toıhanada toı jasalyp jatqanyn anyqtady.

Nátıjesinde toı toqtatylyp, toı ıesine jáne toıhananyń ákimshilik qyzmetkerine QR ÁQBtK 425-baby boıynsha hattama toltyrylǵan.

Maqtaaral polıtseıleri Covid-19 koronavırýsqa baılanysty epıdemıologııalyq jaǵdaıdyń kúrdelenýine oraı karantınniń saqtalýyn baqylaý jumysyn jalǵastyryp jatyr.