Maqtaaralda ózbekstandyq tehnıkamen shıt seýip jatyr
MAQTAARAL. QazAqparat – Maqtaaral aýdanyndaǵy sý basqan egistik alqaptardy qaıta qalpyna keltirip, shıtti maqta egý jumystary bastaldy. Osy maqsatta aýdanǵa Ózbekstan Respýblıkasynyń Jyzaq jáne Syrdarııa oblystarynan 40 arnaıy tehnıka men 243,6 tonna maqta shıti jetkizildi, dep habarlaıdy QazAqparat tilshisi.
Kórshi elden kelgen tehnıkanyń 15-i chızel agregaty bolsa, 11- júıekaralyq qopsytqysh jáne 14-i dán sepkish traktorlary. Osylaısha shekaraly aýdan aýmaǵyna jetkizilgen mamandar men tehnıkalar qazirgi ýaqytta sýy tartylǵan eldi mekenderdegi sharýalarǵa kómektesip, maqta daqylyn qaıta egip berip jatyr. Máselen, J.Nurlybaev aýyldyq okrýgine qarasty Qaraqyr eldi mekenindegi «Jamanqul» sharýa qojalyǵy ózbekstandyq tehnıkanyń arqasynda 7 gektar alqabyna maqta shıtin qaıta seýip shyqty.
«Ózbekstandyq tehnıkanyń kómegimen topan sý basqan 7 gektar alqabyma maqta dánin qaıta seýip aldym. Kórshi aǵaıyndar tehnıkadan bólek, janar-jaǵarmaıyn, surypty shıtin de tegin berip otyr. Bul shyǵynǵa ushyraǵan biz sekildi dıqandarǵa úlken kómek ekeni sózsiz», - deıdi «Jamanqul» sharýa qojalyǵynyń múshesi Jandos Saparhan.
Aıta keteıik, jalpy topan sýdan Maqtaaral aýdanyndaǵy 7 myń 500 gektar egistik alqap zardap shekken bolatyn. Sonyń 5035 gektary Jańajol aýyly okrýgine tıesili. Ózbekstandyq tehnıkalardyń basym kópshiligi de osy aýyl okrýgine bólinip otyr. Budan bólek, Eńbekshi aýyldyq okrýgine qarasty Jańa turmys jáne Jantaqsaı eldi mekeninderindegi jalpy aýmaǵy 113,31 gektar egistik alqapty qaıta óńdeý jumystaryna da ózbekstandyq tehnıkalar bólindi. Sonymen qatar, J.Nurlybaev aýyldyq okrýgine qarasty Qaraqyr eldi mekeninde 61,8 gektar egistikke qaıtara maqta dánin sebý jumystary júrgizilýde.
«Kórshi memleketten kelgen tehnıkalarǵa degen suranys kún sanap artyp otyr. Óıtkeni sharýalar sý shaıǵan alqaptaryna mamyr aıynyń sońǵy kúnderine deıin maqta egýge bolatynyn jaqsy biledi. Sondyqtan olar kúndiz-túni tynbaı egistik alqaptaryn qaıta qalpyna keltirý jumystaryna jumylýda. Bir táýlikte shamamen 100 gektardan astam alqapqa kúlte júrgizilip, 100 gektarǵa maqta egilýde», - deıdi aýdandyq aýyl sharýashylyǵy bóliminiń mamany Jarqynbek Myrzalıev.
